Útlend­inga­stofnun hefur stað­fest að brott­vísun írösku Hussein-fjöl­skyld­unnar, sem til stóð að fram­kvæma í næstu viku, hafi verið frestað. Er það gert í sam­ræmi við úrskurð Mann­rétt­inda­dóm­stóls Evrópu.

„Það eina sem við viljum er að fá að búa á Íslandi, vinna hér og læra eins og venju­legt fólk því við elskum þetta land,“ segir Yasameen Hussein við Heim­ild­ina. Hér hafi þau eign­ast marga góða vini sem séu allir af vilja gerðir að styðja þau og hjálpa. Yasameen og systir hennar eru í námi í Fjöl­brauta­skól­anum við Ármúla. En enda­lausar áhyggjur af því sem gæti verið í vændum hefur tekið sinn toll af þeim öllum. „Við erum auð­vitað að reyna að ein­beita okkur að nám­inu en það hefur verið erfitt.“

Þetta er í annað sinn sem vísa á fjöl­skyld­unni úr landi. Fyrri brott­vís­unin var fram­kvæmd með valdi í fyrra og vakti það reiði margra er lög­reglu­menn tóku Hussein Hussein, sem er fatl­aður og notar hjóla­stól, úr stólnum og komu honum fyrir í bíl sem ekki var til þess búinn að flytja fólk í hjóla­stól. Fjöl­skyldan, sem telur auk Husseins tvær systur hans, bróður og móður, var að því búnu skipað um borð í flug­vél og send í fylgd lög­reglu­manna til Grikk­lands.

Fjöl­skyldan kom fyrst til Íslands í leit að vernd fyrir um þremur árum. En þar sem þau höfðu áður fengið vernd í Grikk­landi ákváðu íslensk stjórn­völd að synja þeim um vernd hér og vísa af landi brott. Í byrjun nóv­em­ber beið lög­reglan eftir systr­unum er þær komu heim úr skól­anum. Og síðan hófst atburða­rás sem fjöl­skyldan hefur lýst sem hræði­legri.

Fjöl­skyldan kom hins vegar aftur til Íslands eftir að Hér­aðs­dómur Reykja­víkur felldi ákvörðun stjórn­valda um brott­vísun til Grikk­lands úr gildi. Þá hafði kæru­nefnd útlend­inga­mála gert Útlend­inga­stofnun að taka umsókn um vernd aftur til með­ferðar.

Ríkið áfrýj­aði nið­ur­stöðu hér­aðs­dóms til Lands­réttar sem hefur enn ekki kveðið upp sinn dóm. Hins vegar komst kæru­nefndin nýverið að þeirri nið­ur­stöðu, að fjöl­skyldan skuli yfir­gefa landið – enn einu sinni.

LögmaðurClaudia Wilson er lög­maður Hussein-fjöl­skyld­unnar.

Mynd: Heiða Helga­dóttir

Til stóð að þau færu 7. nóv­em­ber en Claudia Wilson, lög­maður fjöl­skyld­unnar, kærði brott­vís­un­ina fyrir þeirra hönd til Mann­rétt­inda­dóm­stóls Evrópu. Samkvæmt bráða­birgða­úr­skurði dóm­stóls­ins, sem birtur var fyrr í vik­unni, skulu yfir­völd fresta brott­flutn­ingi fjöl­skyld­unnar til 21. nóv­em­ber sem nú hefur verið fall­ist á.

Dóm­stóll­inn krefur jafn­framt stjórn­völd um svör varð­andi hvernig eigi að standa að brott­flutn­ingi Husseins og hvað verði gert til að tryggja að hann fái við­eig­andi vist­ar­verur og heil­brigð­is­þjón­ustu í Grikk­landi.

Spurð um næstu skref segir Claudia í sam­tali við Heim­ild­ina að hún vænti þess að fá tæki­færi til að bregð­ast við svörum íslenska rík­is­ins til Mann­rétt­inda­dóm­stóls­ins áður en hann svo kveður upp end­an­legan úrskurð um hvort fram­lengja skuli frest á flutn­ingi fjöl­skyld­unnar til Grikk­lands.