Þrír menn voru fluttir á slysadeild eftir að eldur kom upp í húsnæði við Funahöfða 7 síðdegis í gær. Einn hinna slösuðu lést á gjörgæsludeild  nokkru síðar en hinir tveir eru ekki taldir í lífshættu. Þetta kemur fram í tilkynningu frá lögreglunni. 

Eldsupptök eru ókunn en rannsókn lögreglu á brunavettvangi stendur yfir.

Tilkynning um eldinn barst upp úr klukkan þrjú í gærdag og hélt fjölmennt lið viðbragðsaðila þegar á staðinn. Slökkvistarf gekk vel og var að mestu lokið innan klukkustundar.

Eldurinn kom upp á fyrstu hæð hússins í herbergi sem var alelda þegar slökkvilið kom á staðinn. Húsnæðið að Funahöfða 7 er skilgreint sem atvinnu- og skrifstofuhúsnæði.

Vísir ræddi í gær við Jakub Malinowski, sem býr á annarri hæðinni og sagði hann að um 20-30 manns byggju þar; flestir pólskir eins og hann sjálfur en einnig einhverjir litháar og nokkrir frá öðrum löndum. 

Funahöfði 7 er að mestu í eigu tveggja félaga sem eru í eigu þeirra Péturs Árna Jónssonar, framkvæmdastjóra HEILD fasteignafélagsins og aðaleiganda útgáfufélags Viðskiptablaðsins, Jóns Einars Eyjólfssonar, stjórnarmanni hjá ELJU starfsmannaþjónustu, og Arnars Haukssonar, sem hefur unnið sem stjórnandi hjá ELJU.