Bæði skip Hvals hf., Hvalur 8 og Hvalur 9, eru nú komin að bryggju við hval­stöð­ina í Hval­firði. Tvö dýr hafa verið dregin á land og bæði höfðu þau, af myndum af vett­vangi að dæma, verið skotin að minnsta kosti tveimur sprengiskutlum.

Líkt og Heim­ildin greindi frá snemma í morgun var fyrsta dýrið sem veitt var á ver­tíð Hvals þetta sum­arið með einn skutul í eða við höfuð og annan í síð­unni. Hvalur 9 kom að bryggju seinna, með tvo hvali við síðu sína, og annar þeirra hafði fyrir hádegi verið dreg­inn á land þar sem gert er að honum, líkt og það er orðað.

NærmyndHvítir hringir eru á mynd­inni dregnir um tvö sár á skrokk hvals­ins eftir sprengiskutla. Þetta er annar hval­ur­inn sem dreg­inn hefur verið á land í dag.

Mynd: Hard to port

Sá virð­ist einnig vera með sár eftir tvo skutla sem þýðir að dýrið hefur ekki drep­ist við fyrsta skot. Þá hefur þurft að hlaða hval­veiði­byss­urnar aftur og skjóta öðru sinni.

Þriðja lang­reyð­urin er enn í sjónum. Hún verður ekki tekin á land fyrr en búið er að gera að þeirri sem nú er á hval­stöðv­arplan­inu.

„Það hefur því þegar komið í ljós, sem er ekki óvænt í mínum huga, að veiði­að­ferðir Hvals hf. hafa ekki batnað að neinu leyti,“ sagði Arne Feu­er­hahn, fram­kvæmda­stjóri sjáv­ar­vernd­un­ar­sam­tak­anna Hard to Port, sam­taka sem annað sum­arið í röð fylgj­ast náið með veið­unum, við Heim­ild­ina í morgun.

Bæði hval­veiði­skipin héldu til veiða í fyrra­dag og í frétt Morg­un­blaðs­ins um gang veið­anna var haft eftir stöðv­ar­stjóra í Hval­firði að veið­arnar hefðu gengið vel „þrátt fyrir blind­þoku og leið­inda­veður“. Sagði hann enn fremur að hval­veiðar gangi verr „þegar er lítið skyggni“.

Svandís Svav­ars­dóttir mat­væla­ráð­herra heim­il­aði hval­veiðar á ný um mán­aða­mótin og setti nýja reglu­gerð sem hafði það hlut­verk að „bæta umgjörð veiða á lang­reyðum“ líkt og sagði í fyrstu grein hennar. Í reglu­gerð­inni er farið yfir þau skil­yrði sem þurfa að vera til staðar við veiðar og segir að „ytri skil­yrði“ skuli vera með þeim hætti að „líkur séu til þess að aflífun fari fram sam­stundis“. Skuli í því til­liti líta til öldu­hæðar, veð­ur­skil­yrða og skyggnis.

Miðað við lýs­ingar stöðv­ar­stjór­ans var skyggni hins vegar slæmt.

Eft­ir­lits­að­ilar, þ.e. Fiski­stofa og Mat­væla­stofnun, geta sam­kvæmt reglu­gerð­inni kraf­ist úrbóta á verk­lagi „sé það ekki til þess fallið að tryggja fram­an­greind skil­yrði“.

Hvalur hf. hefur heim­ild til veiða á 161 lang­reyði í ár. Í fyrra stóð ver­tíðin í hund­rað daga og lauk 28. sept­em­ber. Á henni voru veidd 148 dýr. Mat­væla­stofnun gerði alvar­legar athuga­semdir við veið­arnar, m.a. að mörg dýr hafi verið skotin marg­sinnis, að sprengiskutlar hafi ekki sprungið og að sum dýr­anna hafi þurft að þola langt dauða­stríð og miklar kvalir.