Ýmsar breytingar á bílastæðagjöldum miðsvæðis í borginni voru samþykktar í borgarráði í dag. Bæði er verið að hækka verð á dýrasta gjaldskyldusvæðinu og lengja þann tíma sem rukkað er fyrir bílastæði á svæðum P1 og P2.

Þær breytingar sem voru samþykktar er að gjaldið á svæði P1 verði hækkað úr 430 krónum upp í 600 krónur og sömuleiðis var samþykkt að hámarkstími í þeim stæðum yrði þrjár klukkustundir.

Að auki var samþykkt að gjaldskyldutíminn á svæðum P1 og P2, þar sem kostar 220 krónur að leggja í eina klukkustund, yrði lengdur þar til klukkan 21 á kvöldin á virkum dögum og laugardögum. 

Einnig verður gjaldskylda á þessum svæðum tekin upp á sunnudögum, á milli kl. 10 og 21, en hingað til hefur verið frítt að leggja bíl á borgarstæðum við götur í miðborginni alla sunnudaga.

Á móti þessum hækkunum kemur að ekki verður lengur gjaldskylda á gjaldsvæði P3 á laugardögum, en þar hefur til þessa verið rukkað á milli kl. 10 og 16 á laugardögum. 

Verðin taka fram úr Árósum en standa Köben langt að baki

Heimildin ákvað að ráðast í smá samanburð á verði bílastæða í Reykjavík og tveimur helstu borgum Danmerkur.

Með þessum hækkunum á gjaldskránni á dýrasta bílastæðasvæðinu í Reykjavíkurborg tekur borgin fram úr Árósum, næststærstu borg Danmerkur, hvað verð á bílastæðum á dýrasta gjaldskyldusvæðinu varðar.

Þar kostar 22 danskar krónur, jafnvirði 441 íslenskra króna, að leggja bíl í eina klukkustund á milli kl. 8-19 á virkum dögum og laugardaga, en lægra gjald er á kvöldin. Þar er einnig rukkað á sunnudögum, en þá er gjaldið einungis 5 danskar krónur á klukkustund, eða um 100 krónur íslenskar.

Hins vegar verður áfram talsvert dýrara að leggja bíl í hjarta Kaupmannahafnar en í hjarta Reykjavíkur, þrátt fyrir þær hækkanir sem hafa verið samþykktar. Í Kaupmannahöfn kostar ein klukkustund á dýrasta gjaldsvæðinu 41 danska krónu, jafnvirði 823 íslenskra króna á gengi dagsins í dag, en verðið á kvöldin frá 18-23 jafngildir 321 íslenskri krónu.