Alvotech tapaði alls 276,2 milljónum Bandaríkjadala á fyrstu þremur mánuðum ársins 2023. Miðað við gengi Bandaríkjadals í lok mars eru það 37,6 milljarðar króna. Það er mun meira tap en var hjá félaginu á sama tímabili í fyrra, þegar það tapaði 10,5 milljörðum króna á fyrsta ársfjórðungi. Munurinn milli ára er því 27,1 milljarðar króna.
Þetta tap bætist við þá 70 milljarða króna sem Alvotech tapaði á árinu 2022 og 12,9 milljarða króna sem félagið tapaði 2021.
Í uppgjörinu kemur fram að Alvotech hafi átt 115,8 milljónir Bandaríkjadali í handbæru fé í lok mars síðastliðins, sem er um 15,8 milljarðar króna á gengi þess gjaldmiðils í lok mars. Það er um 42 prósent af þeim fjármunum sem félagið tapaði á fyrsta ársfjórðungi 2023. Ef Alvotech hefur haldið áfram að tapa fé á sama hraða og félagið gerði á fyrstu þremur mánuðum ársins er ljóst að það fé hefur ekki dugað Alvotech lengi. Innherji, undirvefur Vísis sem fjallar um efnahagsmál og viðskipti, greinir frá því í dag að Alvotech skoði að sækja sér aukið fjármagn í reksturinn.
Fengu ekki markaðsleyfi
Alvotech varð fyrir miklu áfalli í apríl síðastliðnum þegar bandaríska lyfjaeftirlitið (FDA) tilkynnti að það gæti ekki veitt Alvotech markaðsleyfi fyrir AVT02, hliðstæðu líftæknigigtarlyfsins Humira sem er mest selda lyf í heimi. Róbert Wessman, forstjóri, stjórnarformaður og helsti eigandi Alvotech, sagði í viðtali í janúar að það væri „mjög ólíklegt“ að bandaríska lyfjaeftirlitið myndi setja fram frekari athugasemdir sem myndu valda því að ekki væri hægt að hefja markaðssetningu á AVT02 í júlí.
Daginn sem niðurstaða lyfjaeftirlitsins átti að liggja fyrir, þann 13. apríl, var markaðsvirði Alvotech 528 milljarðar króna. Síðan þá hefur það fallið gríðarlega og var í lok dags í gær 358 milljarðar króna. Það þýðir að á rúmum mánuði höfðu 170 milljarðar króna skafist af markaðsvirði Alvotech.
Markaðurinn hefur ekki tekið vel í ársfjórðungsuppgjörið sem birt var í dag. Bréf í Alvotech hafa fallið um tæplega tólf prósent og markaðsvirðið er komið niður í 316 milljarða króna. Virðið hefur minnkað um alls 212 milljarða króna síðan 13. apríl.
Hafa óskað eftir fundi með deild
Fjallað er um synjun lyfjaeftirlitsins í tilkynningu til Kauphallar Íslands vegna uppgjörsins. Þar segir að í svari þess hafi verið bent á að Alvotech þurfi að bregðast við athugasemdum sem gerðar voru í kjölfar úttektar eftirlitsins á framleiðsluaðstöðunni í Reykjavík, til þess að eftirlitið geti samþykkt umsókn Alvotech um markaðsleyfi.
Alvotech er með aðra umsókn um markaðsleyfi fyrirliggjandi hjá eftirlitinu og frestur til að afgreiða hana rennur út 28. júní næstkomandi. „Sú umsókn inniheldur gögn sem staðfesta að lyfið standist kröfur til að markaðsetja megi það sem líftæknilyfjahliðstæðum, auk gagna sem staðfesta að lyfið uppfylli kröfur um útskiptileika við Humira. Skilyrðið sem eftir er að uppfylla til þess að FDA geti afgreitt umsóknina er jákvæð niðurstaða úttektar á aðstöðu fyrirtækisins. Alvotech hefur óskað eftir fundi með þeirri deild FDA sem ber ábyrgð á úttektum á lyfjaframleiðendum (OPMA) til að ræða hvort svör fyrirtækisins við athugasemdum eftirlitsins teljist fullnægjandi.“
Fjárfestingafélagið Aztiq, sem nú heitir Flóki Invest, var stærsti eigandi Alvotech í lok síðasta árs. Það er að stórum hluta í eigu Róberts Wessman og hélt þá á næstum 41 prósenta hlut í Alvotech. Þar á eftir kom Alvogen, systurfélag Alvotech, með um 36 prósent, en Róbert á um þriðjung í því félagi. Þessi tvö félög voru langstærstu eigendur Alvotech. Alls eiga aðrir íslenskir fjárfestar um níu prósent í Alvotech. Yfir 900 manns starfa hjá samstæðunni. Langflestir þeirra, rúmlega 700, starfa hérlendis.
Athugasemdir