Breski fjölmiðlamaðurinn Melvyn Bragg hefur allt frá árinu 1998 stýrt útvarpsþættinum In Our Time, sem varpað er út á BBC Radio 4. Þátturinn hefur verið einn vinsælasti þáttur stöðvarinnar allt frá þeim tíma, en í hverjum þætti kafar Bragg ofan í tiltekið sögulegt málefni ásamt þremur sérfróðum gestum, fræðimönnum á því sviði sem rætt er um.
Þættirnir, sem koma út vikulega, nálgast það brátt að verða þúsund talsins og eru allir aðgengilegir á vefsíðu BBC, auk þess sem finna má alla þætti sem hafa komið út frá árinu 2015 á hlaðvarpsveitum.
Efnistök Bragg og gesta eru margvísleg og óhætt að segja að flestir sem hafa áhuga á því að fræðast um heiminn og söguna ættu að geta haft gagn og gaman af þáttunum, sem eru um 45 mínútna langir.
Á undanförnum mánuðum hefur Bragg fengið til sín gesti til þess að ræða jafn ólíka hluti og írsku byltinguna árið 1798, jötunsteina sem menn komu fyrir hér og þar á Bretlandseyjum til forna, kvikmyndina Citizen Kane, kenningar John Rawls um réttlæti og „Fnykinn mikla“ sem stafaði af skólprennsli í Thames-ána og gerði lífið í bresku höfuðborginni nær óbærilegt sumarið 1858.
Þáttastjórnandinn Bragg er fæddur árið 1939, hóf störf á BBC árið 1961 og hefur starfað við fjölmiðla með hléum allar götur síðan. Hann hefur verið fulltrúi Verkamannaflokksins í lávarðadeild breska þingsins frá því að Tony Blair, fyrrverandi forsætisráðherra, skipaði hann þangað inn fyrir lífstíð árið 2002.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Hlaðvarpið
Vitrari en ég
Níu mínútna fréttaskammtur
Þarf að brjóta upp tæknirisana?
Góðar samræður sem taka sinn tíma
Leiftrandi umræður um alþjóðamál
Athugasemdir