„Okkur hér ber skylda til að gera tillögu að því að reyna þá leið, leið málamiðlana og leið sátta, um að ná núllpunkti svo við getum vonandi þaðan farið að varða leiðina að lausnum til framtíðar. Þetta þarf ekki að vera svona.“
Þetta sagði Þorgerður Katrín Gunnarsdóttir formaður Viðreisnar undir liðnum störf þingsins á Alþingi í dag. Tilefnið er vaxtaákvörðunarfundur Seðlabanka Íslands sem haldinn verður á morgun en mikill meirihluti markaðsaðila gerir ráð fyrir því, samkvæmt könnun Innherja á Vísi, að Seðlabanki Íslands hækki vexti um 75 eða 100 punkta.
Þorgerður Katrín vísaði í frétt Innherja og sagði að markaðurinn hefði einfaldlega misst trú á því að ríkisstjórnin, og eftir atvikum Seðlabankinn, gæti náð verðbólgumarkmiðum sínum í bráð.
„Þetta þýðir einfaldlega á mannamáli að í 12 skipti í röð munu vextir því að öllum líkindum hækka og skilaboðin af vaxtaákvörðunarfundi morgundagsins verða eflaust eitthvað á þá leið að launahækkanir á vinnumarkaði, útgjaldafylleríi hins opinbera og halli á ríkissjóði gefi ekki tilefni til annars; sem sagt endurtekið efni og verðbólgan heldur áfram að gera fjölskyldunum í landinu lífið leitt, enn þá meira endurtekið efni, kynslóð fram af kynslóð. Það eru allir á nálum fyrir morgundaginn en þó ekki þeir sem standa utan krónuhagkerfisins,“ sagði hún.
Þinginu ber skylda til að finna sáttaleið
Verandi aldursforseti þingsins vildi hún sérstaklega koma í pontu og óska eindregið eftir því að þau sem sitja á þingi, og þau sem fara fyrir ríkisstjórninni, kæmu saman og ynnu að sameiginlegri lausn á þessu stjórnlausa ástandi.
„Þar skiptir auðvitað stöðugt gengi líka máli og ég hygg að flestir þekki hvað við í Viðreisn teljum vera stóru lausnina en ég lýsi okkur tilbúin til að vinna með öllum hér að því að koma stjórn á þessar aðstæður og gera hvað í okkar valdi stendur til að koma í veg fyrir þrettándu stýrivaxtahækkunina sem að óbreyttu vofir yfir því það er einfaldlega of mikið undir. Okkur hér ber skylda til að gera tillögu að því að reyna þá leið, leið málamiðlana og leið sátta, um að ná núllpunkti svo við getum vonandi þaðan farið að varða leiðina að lausnum til framtíðar. Þetta þarf ekki að vera svona,“ sagði hún að lokum.
Hið eina vopn sem seðlabankastjóri hefur til stýringar er stýrivextir, sem honum ber að nota ef í óefni stefnir og stjórnvöld gera ekkert.