Sigurlaugu Hreinsdóttur féllust hendur í vikunni þegar hún sá viðtal við Ásgeir Þór Ásgeirsson, aðstoðarlögreglustjóra í Reykjavík, á Vísi þar sem hann „notar nafn dóttur minnar í annarlegum tilgangi,“ segir Sigurlaug í yfirlýsingu. 

Í umræddri frétt er fjallað um að efla eigi öryggismyndavélakerfi í miðborg Reykjavíkur í tilefni af leiðtogafundi Evrópuráðsins sem fram fer hér á landi í maí. Sigurlaugu blöskrar fyrirsögn fréttarinnar. 

„Ég er búin að fá nóg af lögreglunni,“ segir Sigurlaug í yfirlýsingu sem hún sendi fjölmiðlum í dag.  

Sigurlaug var í viðtali við Stundina, annars fyrirrennara Heimildarinnar, í nóvember þar sem hún sagði lögregluna hafa brugðist þegar dótt­ir henn­ar hvarf fyr­ir sex ár­um síð­an. Nefnd um eft­ir­lit með störf­um lög­reglu gerði fjöl­marg­ar at­huga­semd­ir við fram­göngu lög­reglu í mál­inu og beindi til­mæl­um um úr­bæt­ur til rík­is­lög­reglu­stjóra. Hálfu ári eft­ir ákvörð­un nefnd­ar­inn­ar, þar sem beint er tvenn­um til­mæl­um til Rík­is­lög­reglu­stjóra um end­ur­skoð­un verklags­reglna, hafði rík­is­lög­reglu­stjóri enn ekki kynnt sér ákvörð­un­ina.

Ekkert borið á breyttum verklagsreglum

Tíu mánuðir eru nú liðnir frá ákvörðun nefndarinnar og ekkert ber á breytingu á verklagsreglum. „Ber lögregla ekki virðingu fyrir eftirlitinu?“ spyr Sigurlaug, sem segir framkomu lögreglunnar við hana byggjast ekki síst á því að hún hlustaði ekki á hana. 

„Hún hélt að hún vissi betur en ég, varðandi barnið MITT sem þeir þekktu ekki neitt og lögreglan vísaði á bug því sem ég sagði,“ segir Sigurlaug. Hún segir Ásgeir meðal annars hafa sagt við hana að „fólk hefur bara ákveðið rými til að lifa“ þegar hann svaraði spurningu hennar um af hverju þeir tryðu henni ekki þegar hún vildi að lögreglan færi að leita að dóttur hennar. 

„Grímur Grímsson sagði við mig í skætingi „þetta virkar ekki þannig“ þegar ég bað þá að finna bílinn. Í viðtalinu í Stundinni segi ég einnig frá því að Grímur Grímsson sagði að „lögreglan mætti alveg við því að bæta ímynd sína“, þess vegna hafi hann tekið við verðlaunum fjölmiðla, sem byggði á þjáningu dóttur minnar, og þegar engum var bjargað,“ segir Sigurlaug í yfirlýsingu sinni og bætir við: „Hver tekur við verðlaunum þegar barn er tekið af lífi?“  

Nefnd um eftirlit með störfum lögreglu tók undir þær ábendingar Sigurlaugar og segir í úrskurði sínum að það kunni að vera tilefni til að skoða að slíkt ætti að banna í siðareglum í samhengi við 13 grein siðareglna lögreglu, „enda gæti slík staða leitt til þess að draga mætti hæfi lögreglumanns í efa“. 

Lögreglan noti nafn dóttur hennar eins og hún sé þeirra

Sigurlaug segir lögregluna ekki hafa veitt aðstandendum skjól eða hafa nokkurn tímann talað um að það hefði þurft að taka tillit til aðstandenda. Umkvörtunarefni Sigurlaugar til nefndarinnar snerist fyrst og fremst um samskiptin við lögreglu á fyrstu stigum leitarinnar, en einnig samskipti lögreglu við fjölmiðla á meðan leit og rannsókn stóð og sömuleiðis viðtölum sem Grímur og Sigríður Björk Guðjónsdóttir, þáverandi lögreglustjóri á höfuðborgarsvæðinu, veittu vegna lokaritgerðar í fjölmiðlafræði við Háskólann á Akureyri vorið 2017. Nafn dóttur hennar var notað sem efnisorð, en nú er búið að breyta því og læsa ritgerðinni.

„Og nú, eftir að ég hef lagt það á mig að segja söguna og biðja um að nafnið hennar sé ekki notað frekar, þá halda þeir áfram uppteknum hætti að hlusta ekki á mig, að láta eins og ég hafi aldrei sagt neitt, eins og þetta snúist allt um lögregluna, nota nafn dóttur minnar eins og hún sé þeirra til þess að þeirra hugðarefni fái framgang og voga sér að nota dæmið um bílinn til þess að færa rök fyrir því að eigi að setja upp myndavélar, bílinn sem þeir hunsuðu lengst af, og gerðu lítið úr mér þegar ég nefndi hann. Það þarf ekki fleiri myndavélar, það þarf lögreglu sem hlustar á fólk í neyð,“ segir Sigurlaug. 

„Eins og kemur fram í siðareglum lögreglu þá getur hún „…aðeins vænst trausts og virðingar vegna starfa sinna að þeir framkvæmi hlutverk lögreglu með það að leiðarljósi að þjóna samfélaginu af heiðarleika, hlutlægni, réttsýni, nærgætni, trúmennsku, þagmælsku og þekkingu“ og síðar „starfsmenn lögreglu skulu gæta þess að mönnum verði ekki gert tjón, óhagræði eða miski framar en óhjákvæmilegt er eftir því sem á stendur“.“