Fyrri aukaspurning á við myndina hér að ofan:

Hver er þetta?

***

Aðalspurningar:

1.  Hver var forseti Bandaríkjanna 2001-2009?

2.  Hversu margir íbúar búa í höfuðstað Grænlands, Nuuk? Hér má skeika 4.000 til eða frá.

3.  Hvað hét Nuuk áður en grænlenskt nafn var tekið upp?

4.  Fyrir réttum 20 árum kom út fyrsta sólóplata tónlistarmanns sem áður hafði tilheyrt vinsælu tríói. Platan hét Dangerously in Love en hver var og er tónlistarmaðurinn?

5.  Hvaða Íslendingur hefur leikið flesta leiki í ensku Úrvalsdeildinni í karlaflokki?

6.  Í hvaða landi eru Vosgesa-fjöllin aðallega?

7.  Women Talking er ein þeirra kvikmynda sem tilnefndar eru til Óskarsverðlauna sem besta mynd ársins 2022. Myndin er jafnframt tilnefnd til sömu verðlauna fyrir handrit unnið upp úr öðru efni. Íslendingar hefðu svo gjarnan vijað að myndin fengi eina Óskarsverðlaunatilnefningu enn. Hverja þá og hvers vegna?

8.  Þær skammstafanir sem notaðar eru um frumefni í lotukerfinu er mjög oft auðþekkjanlegar af enskum heitum frumefnanna. O stendur fyrir oxygen (súrefni), He fyrir helíum, Al fyrir aluminium o.s.frv. Frumefni nr. 80 er hins vegar skammstafað Hg. Svo vill til að hvorugan bókstafinn — h eða g — er að finna hvorki í ensku eða íslensku nafni frumefnisins. Hvaða frumefni er skammstafað Hg?

9.  Í enskri tungu gildir nákvæmlega það sama um næsta frumefni á undan í lotukerfinu, númer 79. Það er skammstafað Au en hvorki a né u er að finna í ensku heiti frumefnisins. Eitt u er hins vegar í íslensku nafni þess. Hvaða frumefni er Au?

10.  Hringbraut átti upphaflega að ná í hring utan um Reykjavík. En í hvaða evrópsku stórborg er hið upprunalega Ringstrasse sem var á sinn hátt fyrirmynd af Hringbraut?

***

Seinni aukaspurning:

En hver er þetta?

***

Svör við aðalspurningum:

1.  George W. Bush. Sá yngri af Bush-feðgum, sem sé.

2.  Þar búa því sem næst 19.000 manns skv. Wikipedíu svo rétt telst vera 15 til 23 þúsund.

3.  Godthåb.

4.  Beyconcé.

5.  Hermann Hreiðarsson.

6.  Frakklandi.

7.  Hildur Guðnadóttir hefði mátt vera tilnefnd fyrir tónlistina.

8.  Kvikasilfur — hydragyrum á latínu.

9.  Gull — aurum á latínu.

10.  Vínarborg.

***

Svör við aukaspurningum:

Á efri myndinni er Litli prinsinn, söguhetja Antoine de Saint-Exupéry. 

Á neðri myndinni er David Bowie.