Fyrri aukaspurning:

Hér að ofan má sjá nýjan orðaleik sem náði miklum vinsældum á árinu, bæði í tölvum og á snjallsímum. Hvað nefnist hann — á ensku eða í íslensku útgáfunni?

***

Aðalspurningar:

1. Árið 1974 fann Ungverji nokkur upp þraut og/eða leikfang sem margir hafa glímt við æ síðan. Fyrirbærið var nefnt eftir honum sjálfum. Hvað hét Ungverjinn?

2. Orðið alkóhól merkir upphaflega duft sem mulið var niður úr kolum, kohl, enda er alkóhól sama orðið og kol. Duftið var notað sem „eyeliner“ kvenna (og karla!), en seinna var farið að nota það um efni sem eimað var úr öðrum vökva. En úr hvaða tungumáli kemur sjálft orðið alkóhól?

3. Hvaða persóna Biblíunnar er veikust fyrir alkóhóli, og raunar svo mjög að synir persónunnar kvöldust ákaflega yfir fylleríinu?

4. Bakkhus var vínguð í tilteknum trúarbrögðum og er orðið Bakkhus enn notað, sem kunnugt er, þegar vínhneigð ber á góma. En hvaða þjóð hafði Bakkhus í hávegum?

5.  Kensington og Hammersmith eru hverfi í hvaða borg?

6. Hvaða tré hefur verið talað um að rækta undir stórum glerhjúpum í Reykjavík?

7. Hversu margar ljóðlínur eru í rétt ortri haíku?

8. En í venjulegri limru?

9.  Hvernig endaði leikur Íslands og Argentínu á heimsmeistaramótinu í Rússlandi árið 2018?. 

10. Hversu margar eru tröppurnar sem liggja upp að Akureyrarkirkju? Hér má muna 10 tröppum til eða frá en sá sem hefur töluna hárrétta má sæma sig séra-Matthíasar-stigi!

***

Seinni aukaspurning:

Hvað heitir konan?

***

Svör við aukaspurningum:

1. Rubik.

2. Alkóhól er úr arabísku (al-kuḥl eða الكحل) þótt raunar megi víst rekja „kohl“ allt aftur til akkadísku.

3.  Nói.

4.  Grikkir — og Rómverjar. Annaðhvort dugar.

5.  London.

6.  Pálmatré.

7.  Þrjár.

8. Fimm.

9.  1-1.

10. Tröppurnar eru 108 og sú tala gefur séra-Matthíasar-stig. En venjulegt stig fæst fyrir tölu frá 98 til 118

***

Svör við aukaspurningum:

Leikurinn heitir Wordle — eða Orðla í íslenskri útgáfu sem finna má hér. 

Konan er Elizabeth Bowes-Lyon, en nóg er að nefna hana Elísabetu drottningarmóður. Á myndinni var hún að halda upp á 100 ára afmæli sitt árið 2000 og dóttir hennar fagnaði með henni.