Börnum sem bíða eftir þjón­ustu Geð­heilsu­m­ið­stöðvar barna og eftir þjón­ustu Ráð­gjafar- og grein­ing­ar­stöðvar hefur fjölgað veru­lega það sem af er ári. Hins vegar hefur börnum sem bíða eftir þjón­ustu hjá Barna- og ung­linga­geð­deild Land­spít­ala (BUGL) fækkað nokkuð, ef frá eru talin börn sem bíða eftir þjón­ustu tran­steym­is­ins. Bið eftir þeirri þjón­ustu hefur þó styst tals­vert.

Umboðs­maður barna hefur tekið saman upp­lýs­ingar um fjölda barna sem bíða eftir þjón­ustu ýmissa aðila. Fyrst réðst umboðs­maður í slíka upp­lýs­inga­öflun í lok síð­asta árs og byggir sam­an­burður á stöðu mála því á níu mán­aða tíma­bili. Í töflu hér að neðan má sjá fjölda barna sem bíða þjón­ustu nokk­urra aðila og breyt­ingar þar á.

Mest hefur bið auk­ist eftir þjón­ustu hjá Geð­heilu­smið­stöð barna, um 92 börn á tíma­bil­inu og bíða nú 830 börn eftir þjón­ustu mið­stöðv­ar­innar. Þá hefur þeim börnum sem bíða eftir þver­fag­legum grein­ingum hjá Ráð­gjafar- og grein­ing­ar­stöð fjölgað um 67 og eru nú 393 tals­ins. Börn sem bíða eftir aðskil­inni þjón­ustu hjá BUGL eru í heild 121, eilítið færri en í lok síð­asta árs.

Auk þess sem kemur fram í töfl­unni hér að ofan má nefna að 618 börn bíða nú eftir þjón­ustu sál­fræð­inga hjá heilsu­gæslu­stöðvum höf­uð­borg­ar­svæð­is­ins. Með­al­bið­tími eftir þjón­ust­unni er 168 dagar. Sam­bæri­legar tölur fyrir fyrra ár liggja ekki fyrir hjá umboðs­manni.

Á biðlista eftir með­ferð í Barna­húsi er nú 31 barn en voru 38 í des­em­ber. Þá bíða 110 börn eftir þjón­ustu Heilsu­skóla Barna­spít­ala Hrings­ins.

Í des­em­ber síð­ast­liðnum beið 3.701 barn eftir þjón­ustu tal­meina­fræð­inga. Ekki eru til sam­ræmdar tölur um biðlista hjá tal­meina­fræð­ingum svo óljóst er hver staðan er í dag.

Þá birtir umboðs­maður barna fjölda þeirra barna sem ýmist eru sak­born­ingar eða brota­þolar hjá lög­regl­unni á höf­uð­borg­ar­svæð­inu. Ekki eru til upp­lýs­ingar um hversu lengi mál þeirra hafa verið á borðum lög­reglu heldur aðeins fjöldi barn­anna. Til og með 15. ágúst síð­ast­liðnum hafði lög­reglu borist til­kynn­ingar um kyn­ferð­is­brot gegn 40 börnum. Allt árið í fyrra bár­ust til­kynn­ingar um slík brot gegn 152 börnum, sem er óvenju­hátt. Árið 2020 bár­ust lög­reglu þannig 59 til­kynn­ingar um kyn­ferð­is­brot gegn börnum og 89 árið 2019. Í til­kynn­ingu á síðu umboðs­manns segir að meðal ann­ars megi rekja þennan mikla fjölda árið 2021 til mik­illar fjölg­unar mála sem vörð­uðu kyn­ferð­is­legar mynd­send­ingar.