Fyrri aukaspurning:

Hvaða tónlistarmann má sjá hér að ofan?

***

Aðalspurningar:

1.  Í hvaða landshluta er Dalatangi?

2.  Súleiman hinn mikilfenglegi var soldán í hvaða ríki?

3.  Hvernig fallbeygir maður heiti þess dýrs sem í ögn óvirðulegra máli er kallað belja? Sem sé: Hér er — um — frá — til?

4.  Hvað er hringur margar gráður?

5.  Elsta hús Reykjavíkur sem enn stendur, Aðalstræti 10, var reist fyrir iðnfyrirtæki sem fógeti nokkur hafði veg og vanda af að koma upp í Reykjavík. Hvað hét fógetinn?

6.  Og hvað voru þessi iðnfyrirtæki kölluð einu nafni?

7.  En hve gamalt er húsið því sem næst: 310 ára — 260 ára — 210 ára — 160 ára — 110 ára?

8.  Hver leikstýrði stórmyndinni Everest árið 2015? 

9.  Hvaða valdhafi hefur ríkt lengst eftir 1900 (fyrir utan konungborið fólk): Paul Biya, Kamerún — Fidel Castro, Kúbu — Gaddafí, Líbíu — Kim Il-Sung, Norður-Kóreu —  Stalín, Sovétríkjunum?

10.  Árið 1966 lenti bandarísk sprengjuþota í árekstri við eldsneytisvél. Þær voru á flugi yfir sjó skammt frá strönd og þrjár kjarnorkusprengjur sem sprengjuþotan flutti lentu á landi upp, rétt hjá þorpi í suðurhluta tiltekins lands. Sú fjórða fannst í sjónum nokkrum mánuðum síðar. Sprenging varð í tveimur vopnanna sem lentu á landi en náði ekki að kveikja sjálfa kjarnorkusprenginguna. Hvaða land er hér um að ræða? 

***

Seinni aukaspurning:

Þau birtast gjarnan á skjánum þegar kynna þarf klassíska tónlist. Hvað heita þau? Annað nafnið dugar, en þið fáið sinfóníuverðlaun ef þið hafið bæði rétt.

***

Svör við aðalspurningum:

1.  Austfjörðum.

2.  Tyrklandi, Ottómana-ríkinu — hvorttveggja er rétt.

3.  Hér er kýr - um kú - frá kú - til kýr.

4.  360.

5.  Skúli Magnússon.

6.  Innréttingar.

7.  260 ára.

8.  Baltasar Kormákur.

9.  Fidel Castro.

10.  Spán.

***

Svör við aukaspurningum:

David Bowie er á efri myndinni.

Á þeirri neðri eru Guðni Tómasson og Halla Oddný.