Íslensk landslið í knattspyrnu og í körfuknattleik ættu að mæta bæði Rússum og Hvít-Rússum á næstu mánuðum, í undankeppni heimsmeistaramóta og í þjóðadeildinni. Eftir innrás Rússa í Úkraínu, og stuðnings Hvít-Rússa við hana, er vaxandi þungi á sérsambönd að útiloka Rússa frá keppni auk þess sem skorað er á landslið annarra ríkja að neita að taka þátt í fyrirhuguðum leikjum við rússnesk landslið. Þannig hafa Pólverjar til að mynda gefið út að þeir muni ekki mæta til leiks gegn Rússum í marsmánuði. Enn hafa engar slíkar yfirlýsingar verið gefnar út hér á landi.

Íslenska karlalandsliðið í körfuknattleik á að mæta Rússum hér heima 4. júlí næstkomandi í undankeppni heimsmeistaramótsins. Hannes Sigurbjörn Jónsson, formaður Körfuknattleikssambands Íslands, segir að enn hafi ekki verið rætt formlega innan sambandsins hvaða afstöðu það taki varðandi leikinn, enda var karlalandsliðið í verkefni nú um helgina þegar það mætti Ítalíu, fyrst á fimmtudagskvöld hér heima og svo úti á Ítalíu í gær. Því hafi öll orka farið í það verkefni. Hins vegar hafi menn rætt óformlega á milli sín.

„Enginn hefur áhuga á að mæta Rússum eins og staðan er núna. Það á ekki bara við um okkur Íslendinga, Norðurlandaþjóðirnar eru að tala saman og ég heyri að þar hefur enginn áhuga á að spila við Rússa,“ segir Hannes í samtali við Stundina.

Boðaður er stjórnarfundur hjá KKÍ á mánudaginn eftir viku og segir Hannes að hann geri ráð fyrir að þá verði tekin ákvörðun um að íslensk landslið ætli ekki að mæta til leiks gegn landsliðum Rússlands. Í öllu falli verði ákveðið að skora á Alþjóða körfuknattleikssambandið (FIBA) að útiloka Rússa frá keppnum sambandsins. „Það hefur ekki verið tekin ákvörðun en eins og staðan er núna munum við ábyggilega gefa út yfirlýsingu um að við munum ekki mæta þeim. Við erum þó að pressa á FIBA um að taka þá ákvörðun að vísa Rússum úr keppninni. Þetta eru ennþá óformlega samtöl, þó veit ég að einhver lönd hafa sent þeim formleg erindi um það. Við munum senda FIBA erindi þess efnis og það hefur komið til tals að Norðurlöndin gera það sameiginlega.  Ég vona að FIBA taki aðra ákvörðun en FIFA, mér finnst alls ekki nógu langt gengið hjá FIFA.“

Hannes segir að hann hafi ekki rætt sérstaklega við leikmenn landsliðsins, þeir hafi enda haft hugann allan við leikinn gegn Ítalíu. „En það eru allir í kringum okkur sem hafa óbeit á þessum stríðsrekstri Rússa. Ég greini það mjög vel.“

KSÍ segir stöðuna gjörbreytta

Íslenska kvennalandsliðið í knattspyrnu á útileik gegn Hvíta-Rússlandi þann 7. apríl og karlalandsliðið mætir Rússum að óbreyttu ytra 10. júní. Alþjóðaknattspyrnusambandið, FIFA, ákvað að víkja Rússum ekki úr keppnum FIFA. Þess í stað var látið duga að setja Rússum skilyrði. Rússar megi eingöngu leika heimaleiki sína á hlutlausum völlum án áhorfenda, engir fánar verði leyfðir og þjóðsöngur Rússlands ekki leikinn. Þá fái liðin ekki að leika undir merkjum Rússlands heldur undir merkjum knattspyrnusambands Rússlands. FIFA hefur þó sagt að ekki sé enn útilokað að Rússum verði vikið alfarið úr keppnum.

Þegar hafa nokkur knattspyrnusambönd gefið það út að þau muni ekki leika gegn Rússum. Pólska karlalandsliðið á leik gegn þeim 24. mars í Moskvu en hefur gefið út að liðið muni ekki mæta í þann leik. Enska knattspyrnusambandið hefur gefið út að ensk landslið muni ekki mæta rússneskum. Þá hafa leikmenn í einhverjum tilfellum gefið út samsvarandi yfirlýsingar.

Vanda Sigurgeirsdóttir, nýendurkjörinn formaður KSÍ,  gat ekki svarað fyrirspurn Stundarinnar sökum veikinda. Klara Bjartmarz framkvæmdastjóri segir að verið að sé að skoða málin, einkum varðandi leikinn gegn Hvíta-Rússlandi sem er styttra í. „Staðan hefur gjörbreyst eftir innrásina, við erum að safna gögnum en það er ekkert ljóst ennþá.“

Hafsteinn Pálsson, 2. varaforseti Íþrótta- og ólympíusambands Íslands (ÍSÍ), hefur á sinni eigin Facebook-síðu lýst mikill samstöðu með Úkraínu og andstöðu við innrás Rússa. Spurður hvort það hafi farið fram umræða innan ÍSÍ um málið, og hvort komi til greina að gefa út yfirlýsingu þar sem sérsambönd verði hvött til að sniðganga íþróttakappleiki gegn Rússum svaraði Hafsteinn því til að boðaður sé stjórnarfundur á fimmtudaginn. Ekki sé komin dagskrá fyrir þann fund svo hann viti ekki hvort málið komi þar til umræðu. Spurður hvort hann sé þeirrar skoðunar að ÍSÍ ætti að beita sér með þeim hætti svaraði Hafsteinn: „Mér finnst það þurfa að koma sterklega til skoðunar, það er ekkert leyndarmál.“