Myndir og mynd­band sem tekin voru á Þingeyri fyrir helgi sýna hvernig dauðum eld­is­löxum úr eld­iskvíum Arctic Fish er safnað saman og skóflað í dýra­fóður. Starfs­menn Arctic Fish hafa unnið við að hreinsa dauð­fisk­inn úr tveimur sjó­kvíum Arctic Fish síð­ustu vik­urnar. Ástæður laxa­dauð­ans eru sam­verk­andi þættir eins og vetr­ar­kuld­inn og veð­ur­farið hér á landi nú í árs­byrjun en þegar kalt geta mynd­ast sár á eld­is­fisk­unum sem draga þá til dauða. 

Umfang laxa­dauð­ans er miklu meira en Arctic Fish spáði fyrir um í lok jan­úar en þá sagði félagið að um væri að ræða um 3 pró­sent af fram­leiðslu fyr­ir­tæk­is­ins. Nú liggur fyrir að laxa­dauð­inn gæti verið allt að tíföld sú tala. Um er að ræða 300 til 400 þús­und eld­is­laxa í slát­ur­stærð, 5 til 7 kíló hver. 

Stundin hefur greint ítrekað frá laxa­dauð­anum á Þingeyri síð­ustu vik­urnar.

Endanlegt umfang laxadauðans óljóst

Laxa­dauð­inn leiddi til þess að eig­andi Arctic Fish, Norway Royal Salmon, sendi frá sér til­kynn­ingu. Ástæðan er sú að fyr­ir­tækið er skráð á markað í Noregi og þarf að greina frá slíkum upp­lýs­ingum um dóttur- og hlut­deild­ar­fé­lög sín opin­ber­lega. 

Í til­kynn­ing­unni sagði: „Arctic Fish hefur upp­lifað alvar­leg líf­fræði­leg vanda­mál í tveimur af eld­is­stæðum sínum í Dýra­firði, á Íslandi. Umfang laxa­dauð­ans er til skoð­unar en sam­kvæmt áætl­unum mun hann vera 1,5 til 2 þús­und tonn af stórum fiski sem var í slát­ur­stærð og til­bú­inn fyrir mark­að­inn.“ 

Arctic Fish hefur á þessu stigi ekki viljað tjá sig frekar um umfang tjóns­ins og vísar til þess að fyr­ir­tækið er skráð á markað. Um þetta sagði Daníel Jak­obs­son, ráð­gjafi í sér­verk­efnum  og odd­viti Sjálf­stæð­is­flokks­ins í bæj­ar­stjórn Ísa­fjarðar, við Stundina í síð­ustu viku: „Ég get því miður ekki látið hafa neitt eftir mér um það. Það er vegna þess að við erum skráð á markað og þá þurfa þær upp­lýs­ingar að koma jafnt til allra. Við erum tryggð að hluta, það er verið að fara þann hluta og svo er enn óvíst hversu mikið okkur tekst að slátra auk ann­arra óvissu­þátta. Þær upp­lýs­ingar verða til­kynntar þegar að þær liggja fyrir.“