Guðmundur Baldursson, stjórnarmaður í Eflingu, segir Sólveigu Önnu Jónsdóttur, sem sagt hefur af sér sem formaður Eflingar, hafa haldið lykilupplýsingum leyndum fyrir stjórninni til að hylma yfir vanlíðan starfsfólks.

Greint var frá gagnrýni Guðmundar á hendur stjórnenda Eflingar í fréttum Ríkisúvarpsins síðstliðinn föstudag. Þar sagði að Guðmundur hefði ítrekað reynt að fá í hendur ályktun trúnaðarmanna starfsfólks á skrifstofu Eflingar um stjórnarhætti Sólveigar Önnu frá því í júní, en án árangurs.

Fréttaflutningur Ríkisútvarpsins varð síðan til þess að Sólveig Anna greindi starfsfólki Eflingar frá því á föstudaginn að tveir kostir væru í stöðunni. „Annað hvort kæmi eitt­hvað skrif­legt frá þeim sem myndi bera til baka ofstæk­is­fullar lýs­ingar úr ályktun trún­að­ar­manna og orð sem frétta­maður not­aði um „ógn­ar­stjórn“, eða að ég myndi segja af mér for­mennsku í félag­in­u.“ Úr varð að starfsfólk sendi frá sér ályktanir til stjórnenda Eflingar og til Ríkisútvarpsins sem Sólveig Anna túlkaði sem afdráttarlausa staðfestingu á því sem fram hefði komið í ályktun trúnaðarmanna frá því í júní. Við slíka vantraustsyfirlýsingu gæti hún ekki búið og sagði hún því af sér sem formaður.

„Þegar ég gekk á eftir ályktuninni var mér ekki aðeins ítrekað neitað um hana heldur gerð tilraun til að beita mig persónulegri kúgun á grundvelli þess að formaðurinn hefði aðstoðað mína nánustu.“

Í tilkynningu sem Guðmundur sendi blaðamanni Stundarinnar segir hann að alvarlegur trúnaðarbrestur hafi orðið þegar Sólveig Anna hafi neitað að kynna stjórn Eflingar starfslokasamning við fráfarandi skrifstofustjóra í upphafi þessa árs. Því hafi verið borið við að þær upplýsingar kæmu stjórninni ekki við, skrifar Guðmundur. Þá hafi stjórn einnig verið neitað um kynningu á ályktun trúnaðarmanna um stjórnunarvanda á skrifstofu Eflingar í júní síðastliðnum. „Þegar ég gekk á eftir ályktuninni var mér ekki aðeins ítrekað neitað um hana heldur gerð tilraun til að beita mig persónulegri kúgun á grundvelli þess að formaðurinn hefði aðstoðað mína nánustu.“

Segir Sólveigu Önnu hafa slegið á sáttarhönd

Guðmundur segir að hann hafi lagt fram þá tillögu að utanaðkomandi ráðgjafi legði mat á starfsemi Eflingar til að leita lausna en því hafi verið hafnað. Enginn í stjórn Eflingar hafi stutt hann í því máli og enga hjálp hafi verið að fá hjá Starfsgreinasambandinu eða Alþýðusambandi Íslands, þrátt fyrir að fyrir lægi, að sögn Guðmundar, að stjórn Eflingar ætti fullan rétt á að fá allar lykilupplýsingar um starfsemi Eflingar í hendur.

Sólveig Anna hafi þá hvorki brugðist við áskorun starfsmanna um betrumbætur eða gengist við ábyrgð sinni sem formaður. „Þvert á móti hefur hún skellt skuldinni á mig og starfsmenn sína. Botninum náði hún svo þegar hún krafðist þess að starfsmenn veldu á milli þeirra sjálfra og hennar á starfsmannafundi síðastliðinn föstudagsmorgun. Í kjölfarið sló hún í síðasta sinn á sáttarhönd starfsmanna.“