Aðeins tveir flokks­for­menn á Alþingi eru í þeirri stöðu að fleiri treysta þeim mikið en lítið. Katrín Jak­obs­dóttir, for­sæt­is­ráð­herra og for­maður Vinstri grænna, nýtur frekar eða mjög mik­ils trausts 55% kjós­enda, sam­kvæmt nýrri könnun MMR, og hefur það auk­ist úr 48% trausti í nóv­em­ber í fyrra. Hún hefur aldrei notið meira trausts í könn­unum MMR sem teygja sig aftur til apríl 2019. 

Sigurður Ingi Jóhanns­son, for­maður Fram­sókn­ar­flokks­ins, tekur sömu­leiðis stökk í trausti. 38% kjós­enda treysta honum frekar eða mjög mikið, miðað við 31% í fyrra. 

Bjarna vantreyst

Bjarni Bene­dikts­son, for­maður Sjálf­stæð­is­flokks­ins og fjár­mála­ráð­herra, nýtur minna trausts en hinir for­menn rík­is­stjórn­ar­flokk­anna. Það sést á því að 29% segj­ast treysta honum frekar eða mjög mikið, miðað við 25% árið áður. Hins vegar seg­ist meiri­hlut­inn, 56%, treysta honum frekar eða mjög lítið, sem er aukn­ing úr 51% í fyrra. Þróun van­trausts gagn­vart Sigurði Inga og Katrínu er öfug á við Bjarna, nú van­treysta 27% Sigurði Inga, en þau voru 33% í fyrra. Sömu­leiðis van­treysta 23% Katrínu en 28% gerðu það síð­ast.

Sigmundur á botninum og Logi fellur

Færri treysta Loga Ein­ars­syni, for­manni Sam­fylk­ing­ar­innar, eða 17% miðað við 24% í fyrra. Samhliða eykst van­traust á honum úr 40% í 50% og er hann því í sam­bæri­legri stöðu og Bjarni Bene­dikts­son, for­maður Sjálf­stæð­is­flokks.

Lang­minnst traust mælist til Sig­mundar Davíðs Gunn­laugs­sonar, for­manns Mið­flokks­ins, af þeim sem sitja á Alþingi. 76% lands­manna van­treysta honum, en aðeins 7,7% treysta honum.

Gunnar Smári Egilsson, for­maður fram­kvæmda­stjórnar Sós­í­alista­flokks Íslands, nýtur svip­aðs trausts og Sig­mundur, eða 7,8%, þótt færri van­treysti honum, eða 63,2%. 

Könnun MMRAðeins tveir flokks­leið­togar njóta meira trausts en van­trausts.

Mynd: MMR

Katrínu treyst þvert á flokka

Traust gagn­vart Katrínu Jak­obs­dóttur er þvert á flokka, þótt það eigi síst við um Flokk fólks­ins, Mið­flokk­inn og Sós­í­alista­flokk­inn. Athygli vekur að 72% Sjálf­stæð­is­manna treysta Katrínu frekar eða mjög mikið, en 83% þeirra treysta for­mann­inum Bjarna Bene­dikts­syni. Sömu­leiðis treysta 71% kjós­enda Við­reisnar Katrínu, 64% Fram­sókn­ar­fólks og tæpur helm­ingur Sam­fylk­ing­ar­fólks og Pírata. 

Sigurður Ingi Jóhanns­son nýtur trausts 54% Sjálf­stæð­is­manna. Sig­mundur Davíð Gunn­laugs­son, Gunnar Smári Egilsson, Inga Sæland og Logi Már Ein­ars­son njóta lít­ils trausts utan sinna kjós­enda, og svipað gildir um Þorgerði Katrínu Gunn­ars­dóttur, for­mann Við­reisnar, sem nær ekki meira en 24% trausti utan kjós­enda Við­reisnar.

Í sams konar könnun árið 2016 naut Katrín trausts 59% lands­manna en var van­treyst af 21% þeirra. Sig­mundur Davíð Gunn­laugs­son var þá for­sæt­is­ráð­herra með traust 10% lands­manna.