Athugið að hlekkur á síðustu þraut er hér neðst!

***

Fyrri aukaspurning:

Þjóðfáni hvaða ríkis blaktir á myndinni hér að ofan?

***

Aðalspurningar:

1.  Eitt frægasta fótboltalið í veröldinni hefur aðalbækistöðvar sínar á velli sem kallast Camp Nou, þótt enskumælandi fótboltaáhugamenn tali oft um Nou Camp. Hvað heitir þetta lið?

2.  Borgin, þar sem Camp Nou er niðurkomið, hún er höfuðborg í tilteknu sjálfstjórnarhéraði í stóru Evrópuríki. Hvað heitir héraðið?

3.  Pandalus borealis heitir dýrategund ein, sem þrífst á og við Ísland. Dýr af þessari tegund eru þeirrar náttúru að vera karldýr fyrstu árin en breytast þá í kvendýr. Þessi dýr eru lítil en notadrjúg mjög og eftirsótt fyrir mannfólkið. Einu sinni varð stofnun ein eða almenningsfyrirtæki fyrir mikilli gagnrýni fyrir að ætla sér að hefja ræktun á risavaxinni tegund þessara dýra. Hvaða dýr eru þetta?

4.  En hvaða stofnun eða fyrirtæki var þetta?

5.  Hvað heitir sonur Joe Bidens Bandaríkjaforseta sem kom mjög við sögu þegar Trump og Repúblikanar reyndu að tengja hann við fjármálahneyksli í ríki einu. Hér þarf sem sagt fornafn sonarins.

6.  En í hvaða ríki var það sem sonurinn átti að hafa staðið í einhverju vafasömu makki — þótt ekkert slíkt hafi sannast á hann?

7.  Matthew Barney heitir bandarískur listamaður sem var um tíma einn af „tengdasonum Íslands“ eins og þeir karlar eru stundum kallaðir í gamni sem ganga að eiga íslenskar konur. Hjónaband Barneys og hinnar íslensku eiginkonu hans lauk reyndar með skilnaði, en hvað heitir hún?

8.  Í hvaða sveitarfélagi er Gróttuviti?

9.  Hvaða þingmaður ætlar ekki að taka sæti á lista Framsóknarflokksins í Suðurkjördæmi eftir að hafa lent í 3. sæti í prófkjöri flokksins í kjördæminu?

10.  Hvaða frægi herstjóri gerði innrás í Rússland árið 1812?

***

Seinni aukaspurning:

Hver er karlinn á myndinni hér að neðan? Hann hefur elst nokkuð síðan við sáum hann síðast, skal tekið fram.

***

Svör við aðalspurningum:

1.  Barcelona.

2.  Katalónía.

3.  Rækjur.

4.  Orkuveita Reykjavíkur.

5.  Hunter.

6.  Úkraína.

7.  Björk Guðmundsdóttir.

8.  Seltjarnarnesi.

9.  Silja Dögg.

10.  Napóleon.

***

Svör við aukaspurningum:

Fáninn er fáni Indónesíu.

Og karlinn á neðri myndinni?

Það er rússneski skákmeistarinn Boris Spassky.

Hér til hliðar er ögn eldri mynd af honum.

Reynið svo við þrautina á undan, sjá hlekk fyrir neðan.