Benedikt Jóhann­es­son, stofn­andi Við­reisnar, segir Þorgerði Katrínu Gunn­ars­dóttur fara með rangt mál um að hann hafi hafnað boði um að setj­ast í 2. sæti á fram­boðs­lista flokks­ins í Reykja­vík. Þá segir hann Þorgerði rjúfa trúnað um einka­sam­töl þeirra í milli.

Benedikt greinir frá þessu á Facebook-síðu sinni. Ástæðan er frétt mbl.is frá því fyrr í dag en þar er haft eftir Þorgerði að Benedikt hafi verið boðið 2. sæti á lista Við­reisnar í öðru hvoru Reykja­vík­ur­kjör­dæm­inu. Það hafi verið gert eftir að honum hafi verið boðið heið­urs­sætið á lista Við­reisnar í Reykja­vík. „Áður en upp­still­ing­ar­nefnd­in skil­aði inn lista var rætt við Bene­dikt og hon­um boðið annað sæti í öðru Reykja­vík­ur­kjör­dæm­inu sem hann þáði ekki,“ seg­ir Þor­gerður í sam­tali við mbl.is.

„Því fór sem fór“

Þetta segir Benedikt að sé ósatt hjá Þorgerði. Hann hafi sann­ar­lega fall­ist á beiðni Þor­gerðar um að setj­ast í 2. sæti á lista í öðru hvoru Reykja­vík­ur­kjör­dæmanna. Athygli vekur að Benedikt segir að Þor­gerður hafi beðið hann um að setj­ast í umrætt sæti en Þor­gerður sjálf er odd­viti flokks­ins í Suð­ur­kjör­dæmi og situr því trauðla í upp­still­ing­ar­nefnd flokks­ins í Reykja­vík.

„Þor­gerður óskaði eftir því á mánu­dags­morgun að ég tæki 2. sæti á lista flokks­ins í Reykja­vík norður. Ég féllst á þá beiðni, en taldi nauð­syn­legt að þeir sem hefðu komið fram við mig með óvið­ur­kvæmi­legum hætti í þessu máli bæðu mig afsök­unar,“ skrifar Benedikt og vísar þar til þess að honum hafi verið boðið heið­urs­sæti á lista flokks­ins, neðsta sætið. Slík afsök­un­ar­beiðni færi ein­ungis til þess að ljúka „leið­inda­málum“ af sinni hálfu og leggja grunn að góðu sam­starfi, og myndi hann ekki gera þær afsak­anir opin­berar. „Þor­gerður svar­aði eftir umhugsun að slík per­sónu­leg afsök­un­ar­beiðni væri ekki í boði. Því fór sem fór.“

Þá segir Benedikt að hann hafi átt ýmis sam­töl við Þorgerði en þau verið sam­mála um að öll þeirra sam­skipti væru trún­að­ar­mál. „Ástæða þess að ég tala nú um þessi mál er að Þor­gerður kýs að ræða þau opin­ber­lega.“

Benedikt var helsti hvata­maður að stofnun Við­reisnar og for­maður flokks­ins frá stofnun vorið 2016 til 2017. Hann sat á þingi fyrir flokk­inn á árunum 2016 til 2017 og var fjár­mála- og efn­ar­hags­ráð­herra árið 2017.