***
Þetta er 365. spurningaþrautin, sem merkir að þær hafa birst á vef Stundarinnar í eitt ár. Af því tilefni eru allar spurningar tileinkaðar þessum degi. Jafnframt ætla ég að endurbirta síðar í dag fyrstu þrautina frá því fyrir ári.
En fyrri aukaspurning er svona:
Í dag heldur upp á 65 ára afmælið sitt bandarísk leikkona og ljósmyndari sem var á árunum 1981-1983 í sambandi við Andrés Bretaprins, næstelsta son Elísabetar drottningar. Hún var rægð ósleitilega og meðal annars sögð hafa verið klámmyndaleikkona, en það var fjarri öllum sanni, þótt hún hafi leikið í einni „ljósblárri“ mynd. Elísabetu líkaði vel við stúlkuna en lagði þó að Andrési að slíta sambandi við hana. Sem hann og gerði. Hvað heitir afmælisbarnið?
***
Aðalspurningar:
1. Hvaða stjörnumerki dýrahringsins er í gangi í dag, 26. apríl?
2. Í dag heldur upp á 51s árs afmælið sitt kona ein sem bar ættarnafnið Knavs, þegar hún fæddist, en breytti nafninu í Knauss þegar hún gerðist alþjóðleg fyrirsæta. Árið 2005 breyttist eftirnafn hennar svo aftur þegar hún gekk í hjónaband og tók upp nafn eiginmannsins. Þau hjón eignuðust eitt barn. Hvað heitir þetta afmælisbarn dagsins?
3. Á þessum degi árið 1986 varð eitt skelfilegasta slys veraldarsögunnar, sem menn hafa meira að segja ekki enn bitið úr nálinni með. Hvar varð það slys?
4. Í dag heldur upp á 49 ára afmæli sitt íslenskur fótboltamaður. Hann spilaði tæplega 50 landsleiki í karlaflokki og skoraði töluvert af mörkum en verður ævinlega kunnastur fyrir frægt mark sem hann skoraði á Laugardalsvelli 5. september 1998, en það mark gerði Íslendingum kleift að ná 1-1 jafntefli gegn nýbökuðum heimsmeisturum Frakka. Hvað heitir afmælisbarnið?
5. Á þessum degi árið 2004 var lagt fram á Alþingi frumvarp sem varð svo umdeilt að þá var gripið til ákveðins ráðs í íslenskri stjórnsýslu, sem aldrei hafði verið gert áður. Hvað var þetta frumvarp kallað?
6. Á þessum degi árið 1894 fæddist í Alexandríu í Egiftalandi piltur einn. Hann var reyndar ekki ættaður frá Egiftalandi og fluttist þaðan á táningsárum til ættlands foreldra sinna. Maðurinn er frægastur fyrir flugferð sem hann fór þann 10. maí 1941. Flugferðin mæltist afar illa fyrir eiginlega alls staðar og maðurinn þurfti lengi að súpa seyðið af henni. Hvað hét hann?
7. Á þessum degi árið 1564 var nokkur færður til skírnar á Englandi. Sennilega var hann fæddur nokkrum dögum fyrr. Maðurinn var af óbreyttu alþýðufólki en hefur lengi verið einn þekktasti maður í heiminum. Hvað var hann skírður 26. apríl 1564?
8. Þennan dag árið 1865 lést John Wilkes Booth nokkrum dögum eftir afdrifaríkan atburð sem hann bar ábyrgð á. Hvaða atburður var það?
9. Þann 26. apríl 2019 var frumsýnd í Bandaríkjunum kvikmynd, sem sló öll aðsóknarmet og varð á endanum tekjuhæsta kvikmynd sögunnar — met sem hún tók af myndinni Avatar. Þetta var framhaldsmynd annarrar bíómyndar frá árinu áður. Hvað heitir þessi vinsæla kvikmynd?
10. Á þessum degi árið 1937 var gerð alræmd loftárás á bæ nokkurn. Hvað hét bærinn?
***
Síðari aukaspurning.
Þann 26. apríl 1925 var maður nokkur kosinn fyrsti forseti í ríki einu, og átti svo eftir að gegna embættinu til dauðadags. Á myndinni að neðan má sjá stuðningsmenn hans fagna kjöri hans. Hvað hét hann?
***
Svör við aðalspurningum:
1. Nautið.
2. Melania Trump.
3. Kjarnorkuslysið í Tjernobyl.
4. Ríkarður Daðason.
5. Fjölmiðlafrumvarpið.
6. Rudolf Hess, staðgengill Adolfs Hitlers.
7. William Shakespeare.
8. Hann myrti Lincoln Bandaríkjaforseta.
9. Avengers: Endgame.
10. Guernica.
***
Svör við aukaspurningum:
Konan á efri myndinni heitir Koo Stark.
Forsetinn nýkjörni sem spurt er um í seinni spurningunni var Hindenburg fyrsti forseti Þýskalands.
***
Spurningaþrautin
Fyrri grein
364. spurningaþraut: „Hér mætir Mikkel, sjá!“
Næsta grein
Athugasemdir