Þrautin, sem í gær var ný, er nú þrautin frá í gær.
***
Fyrri aukaspurning:
Þessi er nú varla fyrir unga fólkið, en fyrir 50 árum eða svo var gefinn út fjöldi bóka hér á landi um hinn unga og knáa pilt á myndinni hér að ofan. Hann flýgur gjarnan um á „rannsóknarstofunni fljúgandi“ (sem sést í bakgrunninum) og lendir í ótal ævintýralegum ævintýrum. Hvað heitir pilturinn sem gaf bókunum og bókaflokknum nafn sitt?
***
Aðalspurningar:
1. Hvar var hin forna Hnappadalssýsla?
2. Guðmundur Einarsson, Kolbrún Jónsdóttir, Kristín S. Kvaran og Stefán Benediktsson voru um eitt skeið þingflokkur ... hvaða flokks?
3. Kona ein fæddist í bandaríska bænum Chicago árið 1964. Faðir hennar starfaði við vatnsveituna í bænum, móðir hennar var lengst af húsmóðir. Hún á einn bróður, sá var körfuboltamaður á yngri árum en síðar þjálfari. Konan komst í sviðsljósið 2008 og hefur verið þar síðan, þótt hún hafi oft gefið til kynna að henni sé ekki vel við það sviðsljós. Hvað heitir konan?
4. „Í dögun sefur spegill hafsins, / kjölur býr til sár. / Skutullinn bíður komu hvalsins, / klýfur loftið kaldur nár.“ Hver orti svo?
5. Hvað heitir stærsta eyjan út af Austfjörðum?
6. Hvar tíðkast það sem kallað hefur verið hinu óvirðulega nafni „hálftími hálfvitanna“?
7. Í desember árið 1863 var háð orrusta við Moskvu, sem var hluti af blóðugu stríði sem þá hafði staðið í tvö ár. Orrustan við Moskvu var reyndar ekki mjög grimmileg, þetta voru skærur um brú yfir á sem fellur um Moskvu og eftir að þeim lauk mun ekki hafa verið barist á þessum slóðum, þótt stríðið stæði í tvö ár enn með sívaxandi mannfalli. En partur af hvaða stríði var þessi orrusta við Moskvu?
8. Í hvaða landi heitir höfuðborgin Prag?
9. Undir hvaða nafni er Cherilyn Sarkisian þekktust?
10. Hver var Afródíta?
***
Seinni aukaspurning:
Úr hvaða teiknimyndaseríu í sjónvarpi er skjáskotið hér að neðan?
***
Svör við aðalspurningum:
1. Á Snæfellsnesi.
2. Bandalags jafnaðarmanna.
3. Michelle Obama.
4. Bubbi Morthens.
5. Papey.
6. Á Alþingi.
7. Bandaríska borgarastríðinu. Hér var um að ræða Moscow, Tennessee.
8. Tékklandi.
9. Cher.
10. Grísk ástargyðja. (Ekki dugar að kalla hana rómverska.)
***
Svör við aukaspurningum:
Pilturinn knái á efri myndinni er Tom Swift.
Teiknimyndaserían á neðri myndinni er Futurama.
***
Spurningaþrautin
Fyrri grein
345. spurningaþraut: Evrópa, Wozniak og hver var drepinn með ísöxi?
Næsta grein
Athugasemdir