Björgólfur hættir sem forstjóri Samherja

Björgólfur Jóhanns­son lætur af störfum sem for­stjóri Samherja, en hann hefur gegnt því starfi frá nóv­em­ber 2019 þegar Stundin, Kveikur, Al Jazeera og Wikileaks fjöll­uðu um Sam­herj­a­skjölin og mútu­greiðslur fyr­ir­tæk­is­ins til að kom­ast yfir hesta­makríl­skvóta í Namibíu. Þor­steinn Már Bald­vins­son verður á ný eini for­stjóri fyr­ir­tæk­is­ins.

Þetta kemur fram í til­kynn­ingu á vef Samherja. Þor­steinn Már vék í nóv­em­ber 2019, en varð aftur for­stjóri við hlið Björg­ólfs frá mars 2020. „Þær ásak­anir sem hafðar hafa verið uppi á hendur Samherja eru nú komnar í far­veg fyrir dóm­stólum,“ segir í til­kynn­ingu á vef Samherja. „Þar gefst loks tæki­færi til hreinsa nöfn þeirra sem rang­lega eru sak­aðir, ekki með brota­kenndum frá­sögnum í fjöl­miðlum, heldur með kerf­is­bundnum, réttum og lög­mætum hætti. Þannig hefur norski sak­sókn­ar­inn nú kom­ist að þeirri nið­ur­stöðu að ásak­anir um pen­inga­þvætti eigi ekki við rök að styðj­ast og ekk­ert refsi­vert hafi átt sér stað í við­skiptum DNB bank­ans og Samherja og ákveðið að fella málið niður.“

„Þar gefst loks tæki­færi til hreinsa nöfn þeirra sem rang­lega eru sak­aðir“

Þrír íslenskir starfs­menn Samherja sæta nú ákæru í Namibíu vegna máls­ins auk sjö Namib­íu­manna, en þar á meðal er Bernhard Esau, fyrr­ver­andi dóms­mála­ráð­herra lands­ins. Tilkynnt var í dag um að norski bank­inn DNB verði ekki ákærður af sak­sókn­ara þar í landi vegna meintra brota fyr­ir­tæk­is­ins tengdum mál­inu í Namibíu.

Björgólfur hefur verið kjör­inn for­maður hlít­ing­ar­nefndar Samherja en sú nefnd hefur yfir­um­sjón með reglu­vörslu og stjórn­ar­háttum innan sam­stæðu Samherja, að því segir í til­kynn­ing­unni sem Eiríkur S. Jóhanns­son stjórn­ar­for­maður Samherja skrifar undir. Mun hann stjórna skrán­ingu og form­legri inn­leið­ingu slíkra reglna ásamt öðrum ráð­gjafa­störfum fyrir Samherja eftir því sem til­efni verður til.