Regine Martha, sem alltaf er kölluð Coumba, er sex ára, fædd árið 2014 á Íslandi, og gengur í 1. bekk í Vogaskóla. Urður Vala er líka sex ára, fædd árið 2014 á Íslandi, og gengur í 1. bekk í Grandaskóla. Coumbu finnst gaman að fara í skotbolta í frímínútum og Urði Völu finnst gaman að leika úti. Báðar eiga litlar systur á leikskóla. Uppáhaldslitur þeirra beggja er fjólublár. Önnur þeirra á íslenskt vegabréf, hin ekki. Önnur hefur kennitölu en hin bara gervikennitölu. Önnur þeirra getur verið viss um að ríkisborgararéttur hennar á Íslandi tryggi henni búsetu hér á landi og velferðarþjónustu. Að óbreyttu munu íslensk yfirvöld senda hina úr landi.

Coumba er dóttir hjónanna Bassirou Ndiaye og Mahe Diouf, sem hafa búið og starfað á Íslandi í sjö ár. Þau eru frá Senegal en forðuðu sér þaðan vegna trúar sinnar og telja að í heimalandinu bíði þeirra félagsleg útskúfun og hætta. Coumba er sem fyrr segir fædd hér á landi árið 2014 og yngri systir hennar, Marie, er fædd árið 2017, einnig hér á landi. Þær systur hafa alla sína ævi búið hér og aldrei komið út fyrir landsteinana.

Urður Vala er dóttir hjónanna Freys Rögnvaldssonar, höfundar greinarinnar, og Snærósar Sindradóttur. Hún er fædd hér á landi árið 2014 og á yngri systur, Tíbrá Myrru, fædda árið 2018. Þær systur hafa búið alla sína ævi hér á landi en hafa oftar en einu sinni komið út fyrir landsteinana.

Vilja vera á ÍslandiForeldrar þeirra Coumbu og Marie hafa búið hér á landi í sjö ár, unnið og greitt sína skatta og skyldur. Þau vilja fá að dvelja hér til frambúðar með dætrum sínum en hefur fram til þessa verið neitað um það.

Mynd: Davíð Þór

Fá ekki að dvalarleyfi eða vernd

Bassirou og Mahe hafa barist fyrir því í sex ár að fá hér alþjóðlega vernd, dvalarleyfi á grundvelli mannúðarsjónarmiða eða dvalarleyfi vegna sérstakra tengsla við landið, en án árangurs. Síðastliðinn föstudag féll dómur í Landsrétti þar sem úrskurðir Útlendingastofnunar og kærunefndar útlendingamála voru staðfestir. Þó búið sé að fara fram á enn eina endurupptökuna hjá kærunefnd útlendingamála virðist afstaða þeirra sem málum ráða ljós: Hér á landi fær fjölskyldan ekki að búa. Að óbreyttu verður fjölskyldunni, foreldrunum, sem búið hafa hér í sjö ár, og dætrunum tveimur, sem eru fæddar hér á landi og aldar upp, því vísað úr landi.

Uppáhaldsmatur annarrar er hakk og spaghettí, hinnar er plokkfiskur

Foreldrar Urðar Völu hafa aldrei þurft að berjast fyrir því að búa hér á landi, og aldrei hafa dætur þeirra átt á hættu að verða vísað úr landi. Þau sögðu Urði Völu frá fjölskyldunni og því að Coumba, sem væri jafn gömul henni, fengi ekki að búa áfram hér á landi. Urður Vala vildi hitta Coumbu og kynnast henni, spyrja hana um skólann hennar, hvað henni þætti gaman að gera, hvað væri uppáhalds. Það varð úr.

Ákveðnar í að hittast aftur

Þær jafnöldrur hittust heima hjá Coumbu. Svo vill til að fjölskyldan býr í húsnæði sem Urður Vala þekkir vel, húsi sem áður hýsti ungbarnaleikskólann sem Urður Vala gekk í. Þær tóku tal saman.

Uppáhaldsliturinn er fjólublárÞær jafnöldrur Urður og Coumba eiga sér sama uppáhaldslit.

Mynd: Davíð Þór

Uppáhaldsmatur annarrar er hakk og spaghettí, hinnar er plokkfiskur. Uppáhaldsdrykkur annarrar er Kóka kóla en hinnar Pepsí. Uppáhaldsdót annarrar eru Barbie dúkkur en hin segir að uppáhaldsdótið sitt sé slím. Fæstir myndu sennilega halda því fram að á þessu sé grundvallarmunur, að þessar tvær sex ára stúlkur séu gjörólíkar. Báðum þykir gaman að leika sér, lita og mála. Báðum þykir gaman að leika við vinkonur sínar. Báðar eru þær ákveðnar í að hittast aftur, oft og mörgum sinnum í framtíðinni, og leika sér meira saman.