Hér eru spurningarnar frá í gær. Gleymduði nokkuð að svara þeim?

***

Fyrri aukaspurning:

Hver er karlinn lengst til vinstri á myndinni hér að ofan?

***

Aðalspurningar:

1.   Hvað er fokka? Ég meina nafnorðið, ekki sagnorðið.

2.   Eðlisfræðingurinn Erwin Schrödinger var einu sinni að basla við að útskýra furður skammtafræðinnar svokölluðu í eðlisfræði, og bjó þá til hugmynd um ákveðið dýr sem væri í senn lifandi og dautt. Hvaða dýr notaði hann í þessa hugmynd?

3.   Önnur dýraspurning, en giska ólík. Nikolay Przhevalsky hét rússneskur landfræðingur sem ferðaðist víða um Asíu á 19. öld. Hann lýsti fyrstur manna gasellutegund sem við hann er kennd, en líka annarri dýrategund sem heitir líka eftir honum. Menn eru ekki alveg á eitt sáttir um uppruna þess dýrs, en hugsanlega er um að ræða ævaforna útgáfu af dýrategund sem allir þekkja. Hvað er þetta seinna dýr sem kennt er við Przhevalsky?

4.   Með hvaða fótboltaliði spilar Zlatan Ibrahimovic þessa dagana? 

5.   Hvað heitir höfuðborg Serbíu?

6.   Spencer Percival var forsætisráðherra Bretlands 1809-1812. Það fer satt að segja ekki sérstökum sögum af afrekum hans í embætti, þótt Bretar hafi þá verið að ná yfirhöndinni í styrjöld sinni við Napóleon. Percival er hins vegar minnst fyrir allt annan hlut, sem gerir hann einstæðan í röð breskra forsætisráðherra, bæði fyrr og síðar, þótt fáir öfundi hann af því. Hvað er það?

7.    Vítamín eru lífræn efnasambönd sem eru manninum nauðsynleg. Hversu mörg eru vítamínin sem gagnast manninum? Hér má muna einu, til eða frá?

8.   Ég held að ég sé ekki enn búin að spyrja hver var fyrsta konan sem gegndi ráðherraembætti á Íslandi. Þá spyr ég um það nú. Hver var hún?

9.   Hvað heitir stærsti þéttbýlisstaðurinn í Borgarbyggð?

10.   Hvað tónlistarmaður sendi frá sér lög eins og Papa Don't Preach, Live to Tell, La Isla Bonita og Like a Prayer?

***

Seinni aukaspurning:

Hver er konan á myndinni?

***

Svör við aðalspurningum;

1.   Segl.

2.   Köttur.

3.   Hestur.

4.   AC Milan.

5.   Belgrad.

6.   Hann er eini breski forsætisráðherrann sem hefur verið myrtur í embætti. Ekki er nóg að segja að hann hafi dáið – morð verður að nefna.

7.   Þau eru þrettán, svo rétt má vera 12-14.

8.   Auður Auðuns.

9.   Borgarnes.

10.   Madonna.

***

Svar við fyrri aukaspurningu:

Þarna sást í nef og ennisblöð Leníns, kommúnistaleiðtoga í Rússlandi.

Svar við seinni aukaspurningu:

Þetta var Benazir Bhutto, forsætisráðherra Pakistans 1988-1990 og aftur 1993-1996.

***

Og aftur hlekkur á spurningar gærdagsins!