Finnist Khedr-fjöl­skyldan verður henni vísað úr landi eins og til stóð í morgun. Ekkert er breytt í þeim efnum sam­kvæmt upp­lýs­ingum frá emb­ætti rík­is­lög­reglu­stjóra. Sem stendur er þó ekki verið að leita að fólk­inu með mark­vissum hætti.

Jóhann K. Jóhanns­son, upp­lýs­inga­full­trúi rík­is­lög­reglu­stjóra, segir að ekki standi yfir mark­viss leit að Khedr-fjöl­skyld­unni. „Það er ekki komið svo langt, þetta er bara á frum­stigi. Þessi staða kom bara upp í morgun og nú er verið að vinna í því hvernig verður brugð­ist við.“

Finnist fjöl­skyldan verður henni eftir sem áður visað úr landi. „Frá­vís­unin hefur ekk­ert breyst,“ segir Jóhann.

„Frá­vís­unin hefur ekk­ert breyst“

Athygli vakti að lög­fræð­ingur fjöl­skyld­unnar og stuðn­ings­menn hennar náðu ekki síma­sam­bandi við fjöl­skyldu­með­limi í gær. Í morgun, klukkan hálf fimm, þegar stoð­deild rík­is­lög­reglu­stjóra kom á fyr­ir­fram upp­gef­inn stað til að sækja fjöl­skyld­una til brott­flutn­ings gripu lög­reglu­menn hins vegar í tómt. „Bæði fjöl­skyldan og lög­maður hennar voru upp­lýst um þann stað þangað sem stoð­deild myndi koma og sækja þau. Þau voru upp­lýst um það, ekki bara í gær heldur á síð­ustu dögum um hvernig frá­vís­unin yrði fram­kvæmd,“ segir Jóhann.

Segjast bara hafa haft tvær vikur til stefnu

Embætti rík­is­lög­reglu­stjóra sendi í hádeg­inu frá sér yfir­lýs­ingu vegna ummæla Magnúsar D. Norðdahl, lög­manns fjöl­skyld­unnar um að Þor­steinn Gunn­ars­son, sviðs­stjóri Útlend­inga­stofn­unar, hafi hallað réttu máli í Kast­ljósi í gær. Þar kemur fram að ekki sé rétt að stoð­deild rík­is­lög­reglu­stjóra hafi haft sex vikur til að flytja fjöl­skyld­una úr landi á gildum skil­ríkjum. Fram kemur í yfir­lýs­ing­unni að kæru­nefnd útlend­inga­mála hafi hafnað beiðni um að fresta rétt­ar­á­hrifum úrskurð­ar­ins 10. jan­úar. Beiðni til stoð­deildar um brott­flutn­ing hafi borist frá Útlend­inga­stofnun 13. jan­úar síð­ast­lið­inn, en skil­ríki tveggja elstu barn­anna runnu út tveimur vikum síðar.

„Ekki var unnt að skipu­leggja flutn­ing fjöl­skyld­unnar til heima­lands á þeim tveimur vikum sem skil­ríki allra fjöl­skyldu­með­lima voru gild. Slíkar fylgdir krefj­ast lengri und­ir­bún­ings sem meðal ann­ars felst í því afla heim­ilda fyrir íslenska lög­reglu­menn til að ferð­ast til og í gegnum þau ríki sem ferða­leiðin gerir kröfu um,“ segir enn­fremur í yfir­lýs­ing­unni.