Sunnudaginn 6. september mun Stundin sýna beint frá Söngskemmtun Íslensku óperunnar í Norðurljósasal Hörpu, þar sem Elmar Gilbertsson óperusöngvari og Bjarni Frímann Bjarnason píanóleikari munu flytja þekktar óperuaríur og sönglög.

Tónleikarnir hefjast klukkan 17 og verða sýndir beint á vef Stundarinnar og á Facebook-síðum Íslensku óperunnar og Stundarinnar. Þá verður upptaka tiltæk á sömu stöðum í kjölfarið.

Eftirfarandi er tilkynning frá Íslensku óperunni um viðburðinn:

Næstkomandi sunnudag, 6. september kl. 17.00, munu Elmar Gilbertsson óperusöngvari og Bjarni Frímann Bjarnason píanóleikari og tónlistarstjóri Íslensku óperunnar gleðja áhorfendur með vel þekktum aríum og sönglögum í Norðurljósum í Hörpu.

Þessa listamenn þarf ekki að kynna en Elmar er nú fastráðinn við óperuna í Stuttgart. Hann hefur komið fram í fjölmörgum óperuhlutverkum hér heima og erlendis og fengið frábærar viðtökur. Elmar var kjörinn söngvari ársins árið 2016 fyrir hlutverk sitt sem Lensky í óperunni Évgení Onegin í uppfærslu Íslensku óperunnar í Hörpu.

Bjarni Frímann hefur verið Tónlistarstjóri Íslensku óperunnar frá árinu 2018 og á að baki glæsilegan tónlistarferil sem hljómsveitarstjóri og píanóleikari. Hann hefur stjórnað uppfærslum Íslensku óperunnar á undanförnum árum og fengið frábæra dóma og viðtökur áhorfenda. Hann hlaut Íslensku tónlistarverðlaunin sem Tónlistarflytjandi ársins 2020.

Fjarlægðartakmörk verða virt á tónleikunum skv. gildandi tilmælum.

Miðaverð er 3.000 kr. Miðasala á harpa.is.

Við hlökkum til að sjá ykkur!