Helgi Hrafn Gunnarsson, þingmaður Pírata, baðst afsökunar á ummælum sínum á Twitter í gærkvöldi eftir langa umræðu um kynþáttafordóma á Íslandi. Sagðist hann vilja bæta sig, fylgjast með og hlusta á upplifanir svartra Íslendinga eftir að hann hafði lýst því að hafa fundið fyrir rasisma sjálfur þar sem sumir hafi haldið að hann sé múslimi.

Umræðurnar hóf Edda Sigurlaug Ragnarsdóttir, sem er svartur Íslendingur. Sagði hún jafn mikinn rasisma á Íslandi og í öðrum löndum. „Hvítir íslendingar vita bara ekki af því, því það er ekki á yfirborðinu,“ bætti hún við.

„Ég trúi því alveg, enda engin ástæða til að ætla annað,“ svaraði Helgi Hrafn. „Hvítir vita ekki af því vegna þess að þeir finna það sjaldnast á eigin skinni. Reyndar finn ég hann óbeint því sumt fólk heldur að ég sé múslimi því ég kann smá arabísku, og heldur því að ég vilji sádí-arabískt stjórnarfar.“

Brugðust nokkrir Twitter notendur við ummælum Helga Hrafns og sögðu þarna ólíku saman að jafna. Benti Una Hildardóttir, varaþingmaður Vinstri grænna, á að hvítir múslimar verði fyrir aðkasti vegna trúar sinnar óháð húðlit. „Við tvö höfum ekki hugmynd um hvernig upplifun POC er og munum aldrei gera, sama hve miklu aðkasti eða fordómum við verðum fyrir,“ skrifaði Una. POC er skammstöfun fyrir „people of color“, fólk af öðrum húðlit en hvítum.

Bætti þá Edda því við að hún hefði orðið fyrir ofbeldi vegna húðlitar síns í gegnum tíðina. Hún hefði verið lamin, hrækt á hana og fengið flösku í andlitið.

„Ég var hvorki að gera lítið úr þinni upplifun, né að bera hana saman við mína,“ svaraði þá Helgi. „Nefndi þetta bara því að sennilega kannast fæst hvítt fólk við það á Íslandi að verða fyrir þessari tegund fordóma. Var ekki að biðja um neina samúð.“

Edda sagði hann þá hrútskýra rasisma fyrir sér og hvatti hann til að dreifa frekar því sem svartir Íslendinga hefðu að segja þessa dagana. „Það bað enginn um þína skoðun,“ bætti hún við.

„En það er ekki uppbyggilega að bara benda og híja á fólk“

„Þú ákvaðst að taka þessu sem einhverjum samanburði, sem það var ekki,“ skrifaði þá Helgi Hrafn. „Ég skal alveg amplifya það sem svartir Íslendingar segja og hef einlægan áhuga á að heyra allt sem þú hefur að segja. En það er ekki uppbyggilega að bara benda og híja á fólk. Segðu mér meira um þína reynslu, ég vil læra og skilja, en ég segi ekki hluti eftir pöntunum og finnst svona benda-hlæja-híja viðbrögð engum til framdráttar. I can take it, sko, en þetta er bara óþarfi og þvælist í skásta falli bara fyrir. Tölum bara saman.“

Hildur Lilliendahl aðgerðasinni svaraði þá Helga Hrafni. „Helgi plís hættu, þetta er hræðilega vandræðalegt,“ sagði hún. „Hvítt forréttindafólk eins og ég og þú á að styðja og styrkja og hafa vit á að steinhalda kjafti og hlusta. Ekki bera eitt eða neitt saman, við höfum engan alvöru skilning á veruleika brúns fólks.“

„Hvítt forréttindafólk eins og ég og þú á að styðja og styrkja og hafa vit á að steinhalda kjafti og hlusta“

Helgi Hrafn bað Eddu afsökunar í kjölfar frekari umræðna og sagðist ekki hafa ætlað sér að gera lítið úr hennar upplifun. „Bið þig aftur afsökunar, @ekkiedda, áttaði mig ekki á samhenginu en mér er það ljóst núna,“ skrifaði hann að lokum. „Reyni að bæta mig, mun fylgjast með og hlusta.“