Hagar munu ekki greiða hluthöfum sínum arð vegna síðasta rekstarárs í ljósi aðstæðna í þjóðfélaginu, en munu kaupa eigin bréf næstu misseri fyrir allt að 10 prósent af heildarhlutafé félagsins. Slík endurkaup koma oft í stað arðgreiðslna sem aðferð til að skila hagnaði til hluthafa fyrirtækjanna. Hagar er eitt þeirra fyrirtækja sem hafa keypt eigin bréf frá því að neyðarstigi almannavarna var lýst yfir, eða fyrir tæpar 300 milljónir króna á tímabilinu 6. mars til 6. maí. Á sama tíma nýtti félagið hlutabótaleið stjórnvalda, en nú hefur verið ákveðið að endurgreiða þann stuðning.

Hagar lögðu fram ársreikning sinn í gær ásamt fleiri gögnum í aðdraganda aðalfundar félagsins sem fer fram 9. júní næstkomandi. Uppgjörsár Haga er með öðrum hætti en margra félaga, en því lýkur í febrúar í stað desember. Hagnaður félagsins á rekstarárinu nam 3 milljörðum króna og hækkaði úr 2,3 milljörðum á síðasta rekstarári. Síðan þá hefur félagið keypt tvö önnur félög og samanburður milli ára því erfiður. Samkvæmt arðgreiðslustefnu félagsins á að greiða minnst helming hagnaðar hvers árs í arð, sem hefði nú numið 1,5 milljörðum króna  ef arðgreiðsla hefði verið samþykkt.

Hagar reka meðal annars Bónus, Hagkaup, Olís, Útilíf, Zöru og fjölda vöru- og dreifingarfyrirtækja, svo fátt eitt sé nefnt. Félagið eignaðist í fyrra allt hlutafé í fasteignafélaginu DGV ehf. og Olíuverzlun Íslands hf., sem rekur bensínstöðvar Olís. Stærstu hluthafar Haga eru lífeyrissjóðirnir, en útgerðarfélagið Samherji eignaðist 9,26 prósenta hlut í félaginu á árinu.

Eins og áður segir höfðu Hagar keypt eigin bréf fyrir tæpar 300 milljónir króna frá 6. mars til 6. maí. Endurkaupaáætlun félagsins var hrint í framkvæmd 28. febrúar, sex dögum áður en neyðarstigi var lýst yfir. Hefur félagið keypt eigin bréf fyrir megnið af þeirri upphæð sem áætlunin segir til um, sem er alls hálfur milljarðar króna.

Í ársreikningnum kemur fram að laun Finns Árnasonar, fráfarandi forstjóra, hafi lítið breyst frá síðasta rekstarári. Námu þau um 6,9 milljónum króna á mánuði með hlunnindum og mótframlagi í lífeyrissjóð. Nemur það um 21-földum lágmarkslaunum samkvæmt lífskjarasamningnum.

Tilkynnt var um það nýlega að Finnur mundi láta af störfum og nýr forstjóri yrði Finnur Oddsson, sem undanfarin ár hefur stýrt Origo. Einnig lætur af störfum Guðmundur Marteinsson, framkvæmdastjóri Bónus. „Fjárhagsleg áhrif starfslokanna munu koma fram á fyrsta ársfjórðungi rekstrarársins 2020/21 og eru þau áætluð í heild, með launatengdum gjöldum, um 314,5 millj. kr.“ segir í ársreikningnum.

„Ekki er gert ráð fyrir að nýta þurfi önnur úrræði sem í boði eru“

Fjallað er sérstaklega um áhrif Covid-19 faraldursins í ársreikningnum, en þau höfðu ekki komið fram á síðasta rekstarári. Búist er við miklum áhrifum á fyrsta ársfjórðung hins nýja, frá mars til maí, sem nú er að ljúka. „Þá var úrræði ríkisstjórnarinnar hvað varðar hlutabótaleið nýtt að mjög litlu leyti en tekin var ákvörðun þann 8. maí að endurgreiða allan þann kostnað aftur til Vinnumálastofnunar, eða 36 millj. kr.“ segir í ársreikningnum. „Ekki er gert ráð fyrir að nýta þurfi önnur úrræði sem í boði eru.“