„Svarið er: Nei. Það er ekki skynsamleg ráðstöfun,“ sagði Ásgeir Jónsson seðlabankastjóri á blaðamannafundi í morgun um hugmyndir þess efnis að frysta verðtryggingu og koma þannig í veg fyrir hækkun húsnæðislána.

Meðal þeirra sem lagt hafa fram hugmyndina eru Ragnar Þór Ingólfsson, formaður VR, og Vilhjálmur Birgisson, varaforseti Alþýðusambands Íslands. Ragnar og Vilhjálmur sendu frá sér sameiginlega yfirlýsingu 12. mars síðastliðinn og vildu „frysta taf­ar­laust vísi­tölu neyslu­verðs til verð­trygg­ingar og koma þannig til móts við heim­ilin í land­inu sem eru með verð­tryggð hús­næð­is­lán“.

Seðlabankastjóri telur hugmyndina óráðlega. „Í fyrsta lagi erum við ekki að sjá að það sé að koma mikil verðbólga. Í öðru lagi, vextir hafa verið að lækka verulega. Meðal annars þeir vextir sem heimilin greiða,“ sagði hann.

Að hans mati myndu kaup Seðlabankans á ríkisskuldabréfum og magnbundin íhlutun lækka vexti. „Að því leyti má líta á aðgerðir okkar á aðgerðir til handa heimilunum.“

Seðlabankinn hefur ekki birt efnahagsspá vegna faraldursins, en hins vegar kynnti aðalhagfræðingur bankans tvær sviðsmyndir í morgun. Báðar gerðu þær ráð fyrir að verðbólga myndi lækka, úr fyrri spá um 1,9 prósent verðbólgu í 1,5 prósent verðbólgu, sem leiðir af sér samsvarandi hækkun verðtryggðra húsnæðislána.

„Við teljum engin efni til þess að setja þak á verðtryggingu þegar við búumst ekki við verðbólgu og þegar orðið hafa gríðarlegar vaxtalækkanir í gegnum kerfið sem eru að lækka útgjöld heimilanna,“ sagði Ásgeir í morgun.

Þá tiltók hann að kaupmáttur launa hefði hækkað mikið síðustu ár. „Kaupmáttur launa er búinn að hækk a um 35 prósent á síðustu sjö árum. Við munum reyna að varðveita þennan kaupmátt. Tryggja það að við séum ekki að sjá kaupmátt heimilanna minnka. Ég vona að það heppnist.“

Hann úrskurðaði endanlega að hugmyndin væri ekki góð. „Ég myndi ekki segja að það sé sérstaklega góð hugmynd.“

Auk Ragnars Þórs og Vilhjálms ályktaði miðstjórn Alþýðusambands Íslands um helgina að „verðtrygging lána verði fryst tímabundið þannig að möguleg aukin verðbólga birtist ekki í hækkun á verðtryggðum höfuðstóli húsnæðislána og aukinni greiðslubyrði.“