Nemendur í 10. bekk í Hagaskóla hafa verið sendir heim úr skólanum. Ástæðan er mögulegt smit af COVID-19 hjá einum nemanda. Um er að ræða varúðarráðstöfun og hefur smit ekki verið staðfest. Engar breytingar verða gerðar hjá öðrum bekkjum skólans.
Þá tilkynntu almannavarnir í dag að allir sem kæmu frá útlöndum frá og með morgundeginum færu í tveggja vikna sóttkví.
Samkvæmt nýjustu tölum eru 250 staðfest smit af COVID-19 á Íslandi. Þar af eru konur nákvæmlega helmingur og karlar helmingur tilfella. Mesti fjöldi smitaðra út frá aldri eru 40 til 49 ára, eða 68. Sex einstaklingar yfir sjötugu hafa greinst, en það er mesti áhættuhópurinn, ásamt þeim sem hafa undirliggjandi sjúkdóma. Aðeins tvö börn undir tíu ára aldri hafa greinst. Í gær bættust í heildina við 50 greind tilfelli.
Könnun Íslenskrar erfðagreiningar benti til þess að hátt í 1% landsmanna beri smitið. Ef það stæðist væru yfir 3.000 manns með COVID-19 smit á Íslandi í dag, langflest ógreind, með fyrirvara um að úrtak Íslenskrar erfðagreiningar sé lýsandi fyrir þýðið. Rúmlega fjórðungur greindra smita á sér uppruna innanlands og fimmtungur er óþekktur.
Samkomubann er í gildi á Íslandi og mega fleiri en hundrað manns ekki koma saman. Fólk er hvatt til þess að skýla munninum með handleggnum ef það hóstar, að snerta ekki andlit sitt, þvo sér oft um hendur með heitu vatni og sápu í 20 sekúndur og halda tveggja metra fjarlægð frá öðrum.
Nýlega hefur starfsmaður Alþingis greinst með kórónaveiruna, sem og lögreglumaður í Vestmannaeyjum. Um 2.400 manns eru nú í sóttkví eftir ferðir til útlanda eða umgengni við sýkta einstaklinga.
Covid-19
Fleiri smitast af hinni banvænu Nipah-veiru
Heilbrigðisyfirvöld grípa til sóttkvíar eftir Nipah-smittilfelli á Indlandi
Veira dreifist hratt um Evrópu
Sérfræðingar vara við nýjum heimsfaraldri
Suður-Súdan glímir við versta kólerufaraldurinn í 20 ár
Athugasemdir