ESA, eftirlitsstofnun EFTA, sendi athugasemdir til íslensks dómstóls í fyrsta sinn í dag. ESA sendi Héraðsdómi Reykjavíkur skriflegar athugasemdir í máli Samkeppniseftirlitsins gegn Byko og Norvík. Málið varðar ákvörðun Samkeppniseftirlitsins frá því í maí 2015. Þar var Norvík gert að greiða 650 milljóna króna sekt fyrir brot dótturfyrirtæki síns, Byko ehf., á samkeppnisreglum. Þetta kemur fram í tilkynningu frá ESA.
Norvík áfrýjaði ákvörðun Samkeppniseftirlitsins til áfrýjunarnefndar samkeppnismála. Nefndin brot Byko ekki jafn alvarleg og Samkeppniseftirlitið, og taldi ekki sýnt fram á að brotið hefði verið gegn samkeppnisreglum EES-réttar. Sektin var lækkuð um 65 milljónir króna. Samkeppniseftirlitið sætti sig ekki við það og höfðaði mál í febrúar 2016 fyrir Héraðsdómi Reykjavíkur þar sem þess er krafist að Norvík verði gert að greiða 650 milljóna króna sekt í málinu.
Athugasemdir ráðgefandi
Í því máli leggur ESA fram athugasemdir, sem snúa að því hvenær eigi að beita samkeppnisreglum EES-réttar og um varnaðaráhrif sekta í samkeppnismálum. ESA segir málið vekja upp mikilvægar spurningar varðandi túlkun EES-réttar.
„Samkeppnisyfirvöldum og dómstólum aðildarríkjanna er skylt að beita samkeppnisreglum EES-réttar þegar málsatvik falla innan gildissviðs EES-samningsins. Þeim ber einnig að tryggja að reglunum sé beitt af skilvirkni,” segir í tilkynningunni. ESA hefur heimild til að veita ábendingar og leggja fram athugasemdir, en þetta er í fyrsta sinn sem sú heimild er nýtt fyrir íslenska dómstóla. Athugasemdir ESA eru ráðgefandi fyrir dómstólinn.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir