Nær engin verðbólga á Íslandi ef húsnæði er undanskilið - Hæsta verðbólgan er í Noregi

Verðlag á Íslandi hefur nán­ast staðið í stað á síð­ustu tólf mán­uðum, að und­an­skildum hækk­unum á hús­næð­is­verði. Samkvæmt Hag­stof­unni er verð­bólgan, það er verð­lags­hækk­anir á síð­ustu tólf mán­uðum, aðeins 0,2 pró­sent ef hús­næð­iliðum er sleppt í mæl­ingum. Með hús­næði er verð­bólgan aftur á móti 1,5 pró­sent í júní.

Fjallað er um verð­bólgu­þró­un­ina í nýút­kominni skýrslu pen­inga­stefnu­nefndar Seðla­bank­ans til Alþingis og sagt að meg­in­drif­kraftur verð­bólgu að und­an­förnu hafi verið hækkun hús­næð­is­verðs. Vakin er athygli á að fyrir verð­bólgu­mæl­ingar í maí og júní vant­aði upp­lýs­ingar um þróun fast­eigna­verðs á höf­uð­borg­ar­svæð­inu vegna verk­falls lög­fræð­inga hjá sýslu­manni.

„Þótt verð­bólga sé enn lítil hafa verð­bólgu­horfur versnað miðað við spá Seðla­bank­ans frá því í maí sl. þar sem samið hefur verið um mun meiri launa­hækk­anir en sam­rým­ast verð­stöð­ug­leika til lengri tíma litið. Í tengslum við kjara­samn­ing­ana kynnti rík­is­stjórnin einnig aðgerðir sem munu auka rík­is­út­gjöld og draga úr skatt­tekjum og fela því að öðru óbreyttu í sér slökun á aðhaldi í rík­is­fjár­málum,“ segir í skýrsl­unni. Bent er á að verð á mat- og drykkj­ar­vöru hefur hækkað um 2,7 pró­sent frá því í des­em­ber síð­ast­liðnum. Sem fyrr greinir hafa þær hækk­anir, enn sem komið er, ekki haft mikil áhrif til hækk­unar á verð­bólgu.

0,0 prósent verðbólga á Íslandi

Hagstofa Íslands birti í morgun upp­lýs­ingar um sam­ræmda vísi­tölu neyslu­verðs í júní­mán­uði. Vísi­talan mælir verð­bólgu í löndum EES og er eins og nafnið gefur til kynna sam­rýmd milli landa. Mælingin er keim­lík vísi­tölu neyslu­verðs, það er sú sem notuð er til að mæla verð­bólg­una á Íslandi, en er lít­il­lega frá­brugðin. Þannig eru útgjöld ferða­manna tekin með í reikn­ing­inn og ekki er litið til kostn­aðar við eigin hús­næði.

Samkvæmt sam­ræmdu vísi­töl­unni er verð­bólga á Íslandi núll pró­sent. Það er hún einnig í Bret­landi og á Spáni. Verð­bólga mælist mest í Noregi þar sem hún er 2,6 pró­sent en minnst á Kýpur og Grikk­landi, þar sem verð­hjöðnun mælist 2,1 og 1,1 pró­sent. Listann má sjá hér að neðan.