Björn Ingi gefur ekki upp hvernig kaupin á DV voru fjármögnuð

Björn Ingi Hrafns­son, einn af eig­endum Pressunnar ehf., vill hvorki upp­lýsa um kaup­verðið sem félagið greiddi fyrir meiri­hluta hluta­fjár í útgáfu­fé­lagi DV, né hvernig kaupin voru fjár­mögnuð. „Kaup­verðið er trún­að­ar­mál. Og sömu­leiðis hvernig þau eru fjár­mögnuð, en þetta er sam­vinnu­verk­efni með þeim sem áttu blaðið,“ segir Björn Ingi í skrif­legu svari við fyr­ir­spurn Kjarnans.

Í dag var til­kynnt að Pressan ehf., móð­ur­fé­lag Vef­pressunnar og vef­miðl­anna Pressunnar, Eyjunnar og Bleikt, hefði keypt ráð­andi hlut í útgáfu­fé­lag­inu DV. Með kaup­unum er Pressan orðin eig­andi að ríf­lega tveggja þriðju hluta­fjár í DV ehf., en kaupin eru háð sam­þykki Sam­keppn­is­eft­ir­lits­ins.

Í til­kynn­ingu sem Björn Ingi sendi fjöl­miðlum í dag vegna kaupanna kemur fram að þau hafi verið gerð í góðu sam­starfi við eig­endur DV og Þor­steinn Guðnason, núver­andi stjórn­ar­for­maður, verði áfram í stjórn félags­ins. Þá mun Hall­grímur Thor­steins­son, nýráð­inn rit­stjóri DV, gegna stöð­unni áfram.

Í svari Björns Inga við fyr­ir­spurn Kjarnans segir enn­fremur: „Eign­ar­haldið er óbreytt á þessum tíma­punkti, en breyt­ingar á því verða kynntar opin­ber­lega um leið og Sam­keppn­is­eft­ir­litið hefur blessað við­skiptin. [...] Það eru fleiri aðilar að ganga til liðs við okkur í þessum við­skiptum og munum við skýra frá því um leið og við tökum við blað­inu.“