Hæstiréttur hefur staðfest fyrri dóm Héraðsdóms Reykjavíkur um að íslenska ríkið skuli greiða Vífilfelli til baka 80 milljónir sem fyrirtækið hafði greitt í stjórnvaldssekt vegna meintra brota á samkeppnislögum. Dómur þess efnis féll í dag.
Samkeppniseftirlitið og íslenska ríkið þurfa einnig að greiða fyrirtækinu 1,5 milljónir í málskostnað fyrir Hæstarétti, samkvæmt dómnum.
Forsaga málsins er sú, að með ákvörðun Samkeppniseftirlitsins árið 2011 var Vífilfell talið hafa á árunum 2005 til 2008 brotið gegn 11. gr. samkeppnislaga nr. 44/2005 og 54. gr. samnings um Evrópska efnahagssvæðið, með gerð fjölda viðskiptasamninga við endurseljendur á gosdrykkjum, og var Vífilfelli gerð sekt upp á 260 milljónir. Áfrýjunarnefnd samkeppnismála lækkaði svo sektina í 80 milljónir.
Í tilkynningu frá Vífilfelli kemur fram að fyrirtækið fagni dómnum og hlakki til þess að geta tekið þátt í samkeppni á jafnréttisgrundvelli.
Héraðsdómur Reykjavíkur hafði áður snúið við úrskurði áfrýjunarnefndar samkeppnismála þess efnis að Vífilfell hafi brotið gegn samkeppnislögum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir