Yfirlýsing formanna fjögurra stúdentahreyfinga, meðal annars Stúdentaráðs Háskóla Íslands, til stuðnings LÍN-frumvarpi Illuga Gunnarssonar, mennta- og menningarmálaráðherra, var ekki lögð fyrir Stúdentaráð áður en hún var send til fjölmiðla. Þetta kemur fram í yfirlýsingu frá minnihluta ráðsins sem harmar vinnubrögð meirihlutans. 

„Yfirlýsingin var ekki lögð fyrir Stúdentaráð og byggir samþykki hennar á óformlegum samtölum formanns Stúdentaráðs við ráðsmeðlimi um breytingarnar sem gerðar voru á frumvarpinu. Stúdentaráð hefur hvergi fengið útlistun á því hvernig afstaða einstakra ráðsliða var metin við gerð yfirlýsingarinnar og fór engin umræða fram innan ráðsins um frumvarpið eftir meðferð í nefndinni,“ segir þar. 

Stundin greindi frá yfirlýsingunni í gær, en þar skora formenn Stúdentaráðs Háskóla Íslands (SHÍ), Félags stúdenta við Háskólann á Akureyri (FSHA), Stúdentafélags Háskólans í Reykjavík (SFHR) og Nemendasambands Tækniskólans (NST) á Alþingi að afgreiða strax hið umdeilda frumvarp til laga um námslán og námsstyrki. Þinginu átti að ljúka í dag samkvæmt starfsáætlun en frumvarpið á bæði eftir að fara í gegnum aðra og þriðju umræðu. 

„Við krefjumst þess að málið fari á dagskrá og verði tekið fyrir í 2. umræðu sem allra fyrst,“ segir í yfirlýsingu formannanna. „Stúdentar munu ekki una því að bíða til næsta kjörtímabils eftir endurbótum á námsaðstoðarkerfinu. Ekki er hægt að horfa fram hjá því að þetta frumvarp er risastórt skref í átt að því námsaðstoðarkerfi sem við viljum sjá á Íslandi í framtíðinni, en það hefur í för með sér þau atriði sem stúdentar hafa lengi barist fyrir, til að mynda fyrirframgreiðslur, beina námsstyrki og 100% framfærslu.“ 

Fjöldi samtaka og fagaðila hafa gagnrýnt efnisatriði LÍN-frumvarpsins harðlega. Þá leggst stjórnarandstaðan gegn frumvarpinu. Í nefndaráliti minnihluta allsherjar- og menntamálanefndar Alþingis, sem Stundin fjallaði ítarlega um í gær, kemur fram að LÍN-frumvarpið hygli hinum efnameiri á kostnað hinna efnaminni. Þá er fullyrt að frumvarpið stuðli að ójöfnuði og lægra menntunarstigi í landinu með því að takmarka möguleika fólks til að afla sér yfirgripsmikillar menntunar. Bent er á að hjá miklum meirihluta þeirra námsmanna sem fullnýta lánsrétt sinn muni afborgunarbyrði af námslánum aukast ef frumvarpið verður að lögum.

Í yfirlýsingunni frá formönnum stúdentahreyfinganna er skorað á þingmenn stjórnarandstöðunnar að „leggja kosningaslaginn til hliðar“. Þannig er gefið í skyn að andstaða þingmanna við frumvarp Illuga Gunnarssonar stafi ekki af efnisatriðum frumvarpsins eða hugmyndafræðilegum ágreiningi heldur sé liður í vinsældakeppni stjórnmálaflokka í aðdraganda þingkosninga. 

Guðmundur Steingrímsson, þingmaður í minnihluta allsherjar- og menntamálanefndar, tjáir sig um málið á Facebook. „Ég frábið mér ásakanir einstakra stúdentahreyfinga um að andstaða mín og annarra við þetta frumvarp sé hluti af einhverjum bellibrögðum fyrir kosningar,“ skrifar hann og bætir við: „Þetta er einfaldlega arfaslakt frumvarp. Þetta er Thatcherismi í sínu versta formi, þar sem efnameira fólki er skammlaust hampað á kostnað efnaminni. Þetta frumvarp er kristaltært dæmi um ótrúlega vont pólitískt hjartalag.“

Ásta Guðrún Helgadóttir, þingkona Pírata, tekur í sama streng:

„Frumvarpið er umdeilt innan Stúdentaráðs Háskóla Íslands meðal annars af þeim ástæðum að horfið er frá tekjutengdum afborgunum og vaxtaprósenta lánsins þrefölduð en það kemur niður á þeim námsmönnum sem þurfa að fullnýta lántökurétt sinn,“ segir í yfirlýsingunni frá minnihluta Stúdentaráðs.

„Við meðferð í Allsherjar- og menntamálanefnd hlaut frumvarpið ekki breytingar á þessum atriðum. Þær breytingar sem urðu á frumvarpinu við meðferð í nefndinni eru skref í rétta átt en engan veginn nægjanlegar ef Lánasjóður íslenskra námsmanna á að viðhalda hlutverki sínu sem félagslegur jöfnunarsjóður.“ 

Sigríður Hallgrímsdóttir, aðstoðarkona Illuga Gunnarssonar, tekur undir með formönnum stúdentahreyfinganna fjögurra og hvetur stjórnarandstöðuþingmenn til að „láta pólitíska hagsmuni til hliðar og hlusta á námsmenn“: