Ólöf Nordal innanríkisráðherra vill efla tölvubrotadeild lögreglunnar svo koma megi böndum á ólöglegt niðurhal höfundarréttarvarins efnis.

Áform þess efnis voru kynnt á ríkisstjórnarfundi í gær en að því er fram kemur á vef innanríkisráðuneytisins stendur til að fjölga stöðugildum og bæta tæknimenntun lögreglumanna sem sinna tölvuglæpum. Er þetta í samræmi við tillögu nefndar sem starfaði undir formennsku Brynjars Níelssonar, þingmanns Sjálfstæðisflokksins og hafði það hlutverk að gera úttekt á umfangi ólöglegs niðurhals á netinu á höfundarréttarvörðu efni hér á landi og hvort íslensk lagaumgjörð veitti slíku efni nægjanlega vernd.

Mynd: Skjáskot úr myndbandsupptöku af vef Hringbrautar

Halldór Auðar Svansson, borgarfulltrúi Pírata, gagnrýnir forgangsröðunina sem þarna birtist. „Niðurhal á höfundavörðu efni á að setja í forgang. Ég leyfi mér að setja stórt spurningamerki við slíka forgangsröðun. Meginhlutverk löggæslunnar á að vera að vernda fólk gagnvart skaða. Á netinu er stunduð ýmis konar hegðun sem sannarlega getur verið skaðleg fólki - má þar nefna barnaníð og stafrænt kynferðisofbeldi. Deiling á afþreyingarefni hefur hins vegar engin bein skaðleg áhrif á nokkra manneskju,“ skrifar hann á Facebook. 

Þeim tillögum sem eru á forræði innanríkisráðuneytis er lýst með eftirfarandi hætti í tilkynningu á vef innanríkisráðuneytisins: 

Skipulagsbreyting við rannsókn og saksókn á málum af þessu tagi. Lagt var til að stofnuð yrði sérstök netbrotadeild lögreglu þar sem brot gegn rétthöfum höfundarréttarvarins efnis njóti forgangs.

Skylda fjarskiptafyrirtæki til þess að upplýsa notendur vefsvæða skráarskiptiforrita um hugsanleg lögbrot (viðvörun í "pop-up glugga").

Sett verði lög um landslénið .IS og rekstraraðila landslénsins (ISNIC), þar sem reglur yrðu settar um notkun íslenskra léna en engar reglur gilda nú um landslénið.

Mynd: Shutterstock og lögreglan á höfuðborgarsvæðinu

Fram kom í kynningu innanríksráðherra á ríkisstjórnarfundinum í gær að samkvæmt nýrri skýrslu, sem unnin var fyrir Félag rétthafa í sjónvarps- og kvikmyndagerð um umsvif sjónvarps- og kvikmyndaiðnaðar á Íslandi, nemi tap innlendra höfundarrétthafa vegna ólöglegs niðurhals rúmum milljarði króna á ári. Með stofnun sérstakrar netbrotadeildar þar sem brot gegn rétthöfum nytu forgangs yrðu hagsmunir þeirra tryggðir í mun ríkara mæli en nú er gert.

Skiptar skoðanir eru um áformin á samfélagsmiðlum.

Á Pírataspjallinu líst fólki hreint ekki á blikuna. „Lögreglan er í manneklu en við ætlum endilega að fara að elta fólk því það sótti sér efni sem er því ekki aðgengilegt hér á landi. Vændi, fíkniefnaviðskipti og skipulagning, einelti og viðbjóður og það besta sem Nordal vill gera fyrst hún ætlar yfir höfuð að vera að njósna um fólk á netinu er að eltast við simpsons og friends þætti!“ skrifar einn þeirra sem leggja orð í belg.

Halldór Auðar Svansson tjáir sig um málið: 

Og áformin koma femínistanum Hildi Lilliendahl Viggósdóttur á óvart. Hún hélt að netbrotadeildin myndi leggja áherslu á að rannsaka hatursglæpi og ofbeldi á internetinu: