Útvarps­menn­irnir Gunn­laugur Helgason, Heimir Karlsson og Þráinn Gestsson sem stýra þætt­inum Í bít­inu á Bylgj­unni, vöktu máls á því í þætt­inum í morgun hvort Hildur Lilli­endahl ætti að vera látin líða fyrir það, sem starfs­maður Reykja­vík­ur­borgar, að hafa kallað Sindra Sindra­son sjón­varps­mann „epal­homma“ vegna yfir­lýs­inga hans í umræðu um for­dóma um að hann væri sjálfur í mörgum minni­hluta­hópum. 

„Getur þetta haft ein­hverjar afleið­ingar fyrir hana sem starfs­mann borg­ar­innar?“ spurði Heimir Karlsson meðal ann­ars, um orð Hildar.

Aðdrag­and­inn er að Sindri, sem er frétta­þulur á Stöð 2, hjá 365, sama fjöl­miðla­fyr­ir­tæki og útvarps­menn­irnir tveir, lét umdeild orð falla í við­tali við Töru Margréti Vil­hjálms­dóttur, for­mann Samtaka um lík­ams­virð­ingu, í frétta­tíma Stöðvar 2. Hann spurði hvort for­dómar væru „within“ eða inni í okkur sjálfum. Tara Margrét svar­aði að þetta væri í raun­inni talað úr munni ein­hvers sem hefði for­rétt­inda­stöðu og að hann þyrfti að hafa upp­lifað for­dómana í raun og veru til að skilja þetta. Sindri brást hvass við. „Veistu hvað ég er í mörgum minni­hluta­hópum? Ég er hommi, ég á litað barn, það er ætt­leitt, ég er fyrsti sam­kyn­hneigði mað­ur­inn til að ætt­leiða á Ísland, ég er giftur útlend­ingi, eða hálfum útlend­ingi, þannig að við skulum ekki fara þangað.“  

„Veistu hvað ég er í mörgum minni­hluta­hópum?“

Ummælin vöktu athygli og sendu Samtökin 78 meðal ann­ars frá sér yfir­lýs­ingu þar sem þau lýstu yfir von­brigðum með það skiln­ings­leysi sem þau segja Sindra hafa sýnt reynslu og lífs­skil­yrðum jað­ar­settra ein­stak­linga. Hildur var á sama máli. „Jað­ars­setn­ingin á Sindra Sindra­syni ætlar bara ekki að stoppa. Allar fiðl­urnar og öll kertin fyrir hann. Mér er skapi næst að kveikja í hár­inu á mér fyrir aum­ingja kúg­aða hvíta ófatl­aða epal­homman með alla sjón­varps­þætt­ina,“ skrif­aði hún meðal ann­ars á Facebook um málið. 

Hildur Lilli­endahl Er verk­efna­stjóri hjá Reykja­vík­ur­borg en tekur jafn­framt þátt í þjóð­mála­um­ræðu.

Mynd: Páll Stef­áns­son

Efast um tjáningarfrelsi Hildar

Þeir Heimir, Gunn­laugur og Þráinn tóku upp hansk­ann fyrir Sindra, sam­starfs­fé­laga sinn hjá 365, og gagn­rýndu Hildi Lilli­en­dal harð­lega. „Það er svona eins og skíta­fýlan sé farin að kenna rass­gat­inu hvernig á að hegða sér,“ sagði Þráinn Steins­son meðal ann­ars.

Heimir svarar: „Það er annað hvort eitt­hvað að þarna, eða hún sest við tölv­una og hugsar með sér, „jæja best að henda inn einni sprengju núna“ og skrifar eitt­hvað og svo situr hún heima og les þetta og hlær að við­brögð­unum. En þarna er verið að tala við fólk sem er á móti for­dómum en hljómar eins og það sé sjálft með for­dóma.“

Loks spyr Heimir: „Hvað með opin­bera stafs­menn, sem stíga svona fram með svona virki­lega ljótum orðum um eina per­sónu, hvort það megi og hvort það gjaldi fyrir það?“

Sindri Sindra­son neit­aði Stund­inni um við­tal um málið. Hann kveðst ein­göngu ætla að tjá sig um málið á Bylgj­unni, í þætt­inum Reykja­vík síð­degis í dag.

Vegna mis­skiln­ings voru ummæli leið­rétt þar sem orð Þráinns höfð eftir Gunn­laugi.