Strandaði á Viðreisn: Benedikt sagði Katrínu að hann skorti sannfæringu

Katrín Jak­obs­dóttir, for­maður Vinstri grænna, ákvað að slíta stjórn­ar­mynd­un­ar­við­ræð­unum eftir að Benedikt Jóhann­es­son, for­maður Við­reisnar, tjáði henni að hann hefði ekki sann­fær­ingu um að stjórn­ar­myndun tæk­ist. 

Aðspurð stað­festir Katrín þetta í sam­tali við Stundina. 

Aðrir við­mæl­endur blaðs­ins full­yrða að Benedikt Jóhann­es­son hafi sýnt litla samn­inga­við­leitni und­an­farna daga, þagað á fundum og haft fátt til mál­anna að leggja. Stundin hefur ekki náð sam­bandi við Benedikt í kvöld en hann verður gestur Kast­ljóss á eftir.

Birgitta Jóns­dóttir, þing­kona Pírata sem tók þátt í við­ræð­unum fyrir hönd flokks­ins, sendir Benedikt tón­inn á Facebook: „Verð að við­ur­kenna að það kom mér veru­lega á óvart að upp úr þessum við­ræðum hafi slitnað svona snögg­lega. Við vorum búin að leggja mikið á okkur við að koma með til­lögur að mála­miðl­unum og byggja brýr. Því miður tókst ekki að ná fram nákvæm­lega hvað það var sem Viðreisn treysti sér ekki til að mála­miðla um, vegna þess að það komu ekki fram neinar til­lögur frá þeim til hinna fjög­urra flokk­anna.“ 

Við­mæl­endur Stund­ar­innar innan fleiri flokka hafa sömu sögu að segja. Fullyrt er að meg­in­á­stæða þess að ekki tókst að mynda fimm flokka rík­is­stjórn hafi verið tregða Við­reisnar til að sam­þykkja að ráð­ist yrði í auknar tekju­öfl­un­ar­að­gerðir til að hægt væri að standa undir útgjalda­aukn­ingu til heil­brigð­is­mála og inn­viða­fjár­fest­inga strax á næsta ári.  

Eins og Stundin fjall­aði um í morgun véku rík­is­stjórn Sjálf­stæð­is­flokks­ins og Fram­sókn­ar­flokks­ins frá sam­þykktri fjár­mála­á­ætlun sinni í tveimur veiga­miklum atriðum í lok síð­asta kjör­tíma­bils, ann­ars vegar með við­bót­ar­fjár­fest­ingum í sam­göngu­á­ætlun og hins vegar með auknu fjár­magni til almanna­trygg­inga. Báðar aðgerð­irnar eru í raun ófjár­magn­aðar, en um er að ræða tugi millj­arða sem munu valda því að rík­is­sjóður verður rek­inn með halla á næsta ári ef auk­inna tekna verður ekki aflað. Samkvæmt heim­ildum Stund­ar­innar breytt­ist staðan í við­ræð­unum eftir að þetta rann upp fyrir full­trúum Við­reisnar sem vildu síður að aflað yrði auk­inna skatt­tekna til að bæði standa undir þessum útgjöldum og ráð­ast í aukna upp­bygg­ingu heil­brigð­is­kerf­is­ins og inn­viða. 

Samkvæmt heim­ildum Stund­ar­innar hafði náðst breið sam­staða um það meðal flokk­anna að farið yrði í inn­köllun og upp­boð á afla­heim­ildum, að minnsta kosti í til­rauna­skyni, þótt ekki hafi verið búið að greiða úr öllum álita­málum um útfærslu og fram­kvæmd slíkrar leiðar. „Þarna var a.m.k. kom­inn góður grund­völlur að sátt, það er alveg á hreinu að þetta strand­aði ekki á sjáv­ar­út­veg­inum,“ segir einn af við­mæl­endum blaðs­ins. 

Smári McCarthy, þing­maður Pírata, tekur undir þetta í Facebook-færslu. „Það er rangt að þetta hafi strandað á sjáv­ar­út­vegs­málum (það var komin tölu­verð sátt) eða land­bún­aði (sem var varla byrjað að ræða). Þetta strand­aði á óbil­girni. Það er vinna stjórn­mála­manna að miðla málum og ná sáttum, jafn­vel þegar það er sárt. Það var það sem brást,“ skrifar hann.