Skattar álfyr­ir­tækja lækka um 1,6 millj­arða króna, ef miðað er við árið í fyrra, vegna ákvörð­unar rík­is­stjórn­ar­innar um að afnema raf­orku­skatt. 

Raf­orku­skatt­ur­inn var lagður tíma­bundið á árið 2009 vegna efna­hag­skrepp­unnar, en var fram­lengdur. Bjarni Bene­dikts­son fjár­mála­ráð­herra sagði á fundi Samáls­sam­taka álfyr­ir­tækja, í vik­unni,  að afnám skatts­ins væri „for­gangs­mál“.

227 milljarða króna útflutningur

Fjöl­miðla­mað­ur­inn Kristinn Hrafns­son, tals­maður Wikileaks, er einn þeirra sem gagn­rýnir aðgerð­ina harð­lega. Hann opin­ber­aði á sínum tíma raun­verð á raf­orku til stór­iðju. Í ljós kom að Norðurál greiddi 2 krónur á kílóvatts­stund, á meðan íslenskur almenn­ingur greiddi 10 krónur á kílóvatt­stund.

„Á dög­unum var til­kynnt á hátíð­ar­sam­komu álfyr­ir­tækj­anna (Samáls) að útflutn­ings­verð­mæti áls á liðnu ári hefði numið 227 millj­örðum króna. Sé miðað við arð­sem­is­hlut­fallið hjá Norð­ur­áli eru 80-90 millj­arðar eftir þegar búið er að borga allan rekstr­ar­kostnað; launin, súrálið, raf­ork­una og annað. Kastljós hefur svo sýnt hvernig stór hluti hagn­aðar fer úr landi vegna skuld­setn­ingar skúffu­fyr­ir­tækja í aflands­skjólum sem bera öll merki sýnd­ar­gjörn­inga. Það er auð­vitað galið að þessi tug­millj­arða verð­mæti verði ekki að stórum hluta eftir inn­an­lands.,“ segir Kristinn á Facebook-síðu sinni. Hann líkir Íslandi við nýlendu­ríkið Kongó, sem á sínum tíma var undir harðri stjórn Leópolds Belg­íu­kon­ungs.