„Þetta var eig­in­lega bara ótrú­legt þetta árið. Salan jókst mikið í fyrra en núna varð algjör spreng­ing. Það klárað­ist allt á laug­ar­deg­inum, tveimur dögum fyrir hrekkja­vöku, og það var sleg­ist um síð­ustu graskerin,“ segir Pétur Alan Guð­munds­son, kaup­maður í Mela­búð­inni. Höfðu kaup­menn þar þó und­ir­búið sig vel, birgt sig ræki­lega upp og meðal stillt upp graskerjum í stóru keri utan við búð­ina. „Sumar fjöl­skyldur voru að kaupa tvö, jafn­vel þrjú grasker. Eitt á hvert barn.“

Hann segir það aug­ljós­lega hafa ýtt undir hrekkj­ar­vöku­á­huga Vest­ur­bæ­inga að búið var að búið var að bera miða í hús sem fólk var hvatt til að hengja út í glugga, ef það var til­búið til að „taka á móti nornum, draugum og öðrum óvættum í nammi­leit.“ Fjöldi fólks brást vel við skila­boð­unum og var mikil stemn­ing í hverf­inu þetta kvöld, skelfi­legar litlar verur á stjái um allar trissur og log­andi grasker við þriðja hvert hús.  

Bananar, stærsti inn­flytj­andi græn­metis og ávaxta, seldu nær allt það magn sem þeir fluttu inn fyrir hrekkja­vök­una í ár. „Þetta hefur stig­magn­ast hjá okkur ár frá ári. Það er nær ekk­ert eftir af því sem við fluttum inn í ár, ekki nema eitt lítið kar,“ segir Örvar Karlsson, sölu- og mark­aðs­stjóri Banana. Í ár hafi Bananar selt versl­unum og veit­inga­stöðum 50 tonn af graskerjum. Árið 2010 hafi tonnin verið tíu. Salan hafi því fimm­fald­ast á nokkrum árum.