Bæjarfulltrúi Fólksins í bænum í Garðabæ hefur lagt inn fyrirspurn til bæjarstjóra um hvort jafnræðisreglur almennrar stjórnsýslu hafi verið brotnar hjá bænum þegar fyrirhugaðar framkvæmdir við fjölnota knatthús á Ásgarðssvæði voru kynntar fyrir einungis hluta af bæjarfulltrúum, það er öllum nema fulltrúa Fólksins í bænum.
„Við fréttum af því að búið sé að láta teikna hálft hús á Ásgarðssvæðið sem sé búið að kynna fyrir Stjörnunni og minnihlutanum, öðrum en okkur,“ segir María Grétarsdóttir, bæjarfulltrúi Fólksins í bænum í Garðabæ, í samtali við Stundina. „Okkur finnst mjög sérkennilegt að kalla til alla aðila málsins nema okkur. Þess vegna sendum við inn þessa fyrirspurn.“
„Hvort sem þetta er kallað einelti eða valdníðsla, þá eru þetta óeðlileg vinnubrögð.“
María segir Gunnar Einarsson, bæjarstjóra, hafa boðað aðra fulltrúa minnihlutarins einslega á sinn fund og kynnt fyrir þeim fyrir fyrirhugaðar framkvæmdir. Þá segir hún að fulltrúum bæjarráðs, sem mættu til fundar á þriðjudag, hafi fundist þessi vinnubrögð eðlileg. „Menn gætu hisst utan funda og rætt málin þó það sé ekki endilega haft samband við alla,“ segir hún. „Gunnar lét það fylgja að hann gerði þetta í hinum ýmsum málum, að hringja í aðra fulltrúa minnihlutans til þess að fara yfir málin.“
Í samtali við Stundina vísar Gunnar ásökunum Maríu alfarið á bug og bendir á aðeins sé um að ræða almenna umræðu en ekki úrlausn málsins.
Athugasemdir