Píratar tilkynntu á blaðamannafundi rétt í þessu að þeir útilokuðu samstarf með Sjálfstæðisflokknum og Framsóknarflokknum, til að fyrirbyggja „spillingu“ og  „pólitíska ómöguleika“. 

Þeir hafa haft samband við aðra flokka um að hefja viðræður um málefni strax, svo unnt verði að kynna niðurstöður viðræðnanna og þær málamyndanir sem yrðu fylgifiskur viðræðnanna fyrir kosningar, fremur en eftir kosningar, eins og venja er.

Birgitta Jónsdóttir, þingmaður Pírata, sagði að ekki hefði tíðkast á Íslandi að kjósendur fengju að vita hvað þeir fengju eftir kosningarnar og að það væri hluti stjórnmálahefðarinnar að svíkja kosningaloforð.

„Píratar eru tilbúnir til að hefja strax formlegar viðræður um samstarf við aðra flokka út frá fimm megin áherslum Pírata til þess að geta lagt drög að stjórnarsáttmála áður en þjóðin gengur til kosninga,“ sagði Birgitta Jónsdóttir, í yfirlýsingu sem lesin var upp.

„... kjósendur eigi heimtingu á því að vita hvaða þýðingu atkvæði þeirra hefur“

„Ákvörðun þessi var tekin á grundvelli þess að Píratar trúa á mikilvægi upplýstrar ákvarðanatöku og að kjósendur eigi heimtingu á því að vita hvaða þýðingu atkvæði þeirra hefur þegar þeir skila því í kjörkassann á kjördag. Alltof oft hefur það gerst að þeir flokkar sem fara saman í stjórnarsamstarf brjóti kosningaloforð sín um leið og stjórnarsáttmáli er undirritaður og svíkja þannig kjósendur sína og bera við „pólitískum ómöguleika“. Það vilja Píratar ekki gera og því var ákveðið að fara þessa leið,“ sagði í yfirlýsingunni.

Haft samband við fjóra flokka

Píratar hafa sent bréf til  formanna Vinstri grænna, Bjartrar framtíðar, Samfylkingar og Viðreisnar. „Þetta eru þau framboð sem við teljum líklegast að komist inn sem við teljum okkur fært að standa með,“ sagði Smári McCarthy, oddviti flokksins í Suðurkjördæmi, spurður hvers vegna haft hefði verið samband við þessa tilteknu flokka.

„Forvitnilegt að sjá hvort við náum samstöðu um grundvallarmál,“ sagði Birgitta Jónsdóttir.

Bréfin voru send í morgun og því hafa enn ekki borist svör frá forsvarsmönnum flokkanna.

„Pólitískur ómöguleiki“ að standa við kosningaloforð

Sjálfstæðisflokkurinn og Framsóknarflokkurinn voru harðlega gagnrýndir á fyrri hluta kjörtímabilsins fyrir að neita að halda þjóðaratkvæðagreiðslu um framhald viðræðna við Evrópusambandið og slíta þeim þess í stað einhliða með bréfi frá Gunnari Braga Sveinssyni utanríkisráðherra. 

Formenn beggja flokka höfðu lofað því fyrir kosningar að leysa málið með þjóðaratkvæðagreiðslu, en Bjarni Benediktsson og Sigmundur Davíð Gunnlaugsson, formenn flokkanna, lýstu því að ekki gengi upp að láta almenning ráða í málinu þar sem þingflokkar beggja stjórnarflokkanna væru andvígir inngöngu í Evrópusambandið. Bjarni Benediktsson, formaður Sjálfstæðisflokksins, lýsti því í samtali við Kastljósið sem „pólitískum ómöguleika“: „Ég get ekki fyllilega staðið við það að láta fara fram þjóðaratkvæðagreiðslu um það hvort við höldum áfram viðræðum við Evrópusambandið þar sem það er pólitískur ómöguleiki til staðar.“