Óli Björn Kárason, þingmaður Sjálfstæðisflokksins og nýkjörinn formaður efnahags- og viðskiptanefndar Alþingis, þáði styrk frá fyrirtæki sem kemur fyrir í Panamaskjölunum og átti hlut í aflandsfélagi á Bresku Jómfrúareyjunum á árunum 2007 til 2010. 

Frá því að fjallað var um Panamaskjölin síðasta vor hefur efnahags- og viðskiptanefnd Alþingis átt aðkomu að þverpólitískri vinnu er lýtur að aflandsstarfsemi og skattaundanskotum. Þannig var til dæmis fyrrverandi formanni nefndarinnar, Frosta Sigurjónssyni, falið að „skera upp herör gegn skattaskjólum“ en nefndin fundaði með fulltrúum skattrannsóknarstjóra, ríkisskattstjóra og Seðlabankans og skilaði í kjölfarið skýrslu um skattaskjól og mögulegar lagabreytingar til að sporna við starfsemi þeirra.

Formenn og varaformenn allra fastanefnda Alþingis voru kjörnir á Alþingi í síðustu viku og fékk Óli Björn formannssætið í efnahags- og viðskiptanefnd. 

Samkvæmt upplýsingum sem birtust á vef Ríkisendurskoðunar í síðustu viku þáði Óli Björn styrki frá þremur fyrirtækjum og tveimur einstaklingum í prófkjörsbaráttu sinni. Eitt fyrirtækjanna, Sigla ehf, sem styrkti hann um 150 þúsund krónur, kemur fyrir í Panamaskjölunum og var hluthafi í félaginu Petrina Properties Inc. Umrætt félag var stofnað og skráð á Bresku Jómfrúareyjunum árið 2007 með aðstoð lögmannsstofunnar Mossack Fonseca og afskráð árið 2010.

Sigla er, samkvæmt þeim upplýsingum sem fáanlegar eru á Credit info, í eigu Gana ehf, félags Tómasar Kristjánssonar, og er stjórnarformaður félagsins Finnur Reyr Stefánsson. Sigla á 95 prósenta hlut í Klasa fjárfestingu og Heljarklambi hf., 85 prósenta hlut í Klasa ehf og 66,7 prósenta hlut í Draupni-Siglu ehf. Þá á félagið einnig í Senu, Kviku banka, Regin, Skeljungi, Sjóvá-Almennum tryggingum og OZ ehf. 

Sjá einnig:

Spyr hvort útvista megi starfsemi eftirlitsstofnana til einkaaðila