Ungur maður á þrítugsaldri fannst látinn heima hjá sér aðfaranótt sunnudagsins 21. ágúst síðastliðinn en dauðsfallið er rakið til misnotkunar á verkjalyfinu Fentanyl. Félagi mannsins sem lést var einnig hætt kominn á skemmtistað í miðborg Reykjavíkur vegna sama lyfs en hann fór í hjartastopp. Sá komst til lífs aftur og er líðan hans eftir atvikum. Lögreglan rannsakar bæði málin og hafa forsvarsmenn hennar óskað eftir fundi með Landlæknisembættinu þar sem reynt verður að stemma stigu við misnotkun á efnum sem þessum.

Verkjalyfið Fentanyl er eitt af fleiri tugum lyfja sem fáanleg eru á svörtum markaði hér á landi en framboð af slíkjum lyfjum hefur stóraukist að undanförnu. Lyfin eru markaðssett með hjálp samfélagsmiðla á borð við Facebook en þar fer einnig sala þeirra flestra fram. Sölurnar eiga sér stað í lokuðum hópum á Facebook sem hafa það eitt að markmiði að auglýsa lyfseðilsskyld lyf og ólögleg fíkniefni til sölu. Sölumennirnir, líkt og þær tegundir lyfja sem seld eru, hlaupa á tugum. Blaðamaður Stundarinnar ræddi við einn af þeim sölumönnum sem auglýsa lyf til sölu á Facebook.

Viðkomandi vildi ekki koma fram undir nafni en var tilbúinn til þess að gefa blaðamanni smá innsýn inn í sölu á þessum lyfjum, hvaða lyf eru til sölu, hvað þau kosta og hvernig þeim er útvegað.