Sigurlaug Hreinsdóttir, móðir tvítugu stúlkunnar Birnu Brjánsdóttur, sem leitað er að eftir að hún fór að skemmta sér í miðborg Reykjavíkur, segir að áherslur í leitinni að henni gætu hafa breyst.
Talið var að Birna hefði verið í Hafnarfirði, þar sem sími hennar hafði verið í gangi í Flatahrauni á sjötta tímanum aðfararnótt laugardags, og gekk móðir hennar um svæðið í dag með mynd af henni og sýndi fólki sem varð á vegi hennar.
Sigurlaug segir hins vegar á Facebook-síðu hennar að það sé mögulegt að síma hennar hafi verið stolið og að hún væri annars staðar. „Það lítur jafnvel út fyrir að símanum hennar Birnu hafi verið stolið, hún hættir að senda skilaboð kl 3 um nóttina og sést ganga ein upp Laugarveginn. Sem gæti breyt leitarfókusnum töluvert.“
Áður hafði komið fram að Birna hefði síðast sést á skemmtistaðnum Húrra um klukkan þrjú um nóttina. Sigurlaug segist vita til þess að sett hafi verið „í glasið hjá einni stelpu“ á staðnum þetta kvöld.
Lögreglan hefur enn ekki gefið út frekari tilkynningu um leitarsvæðið. Í síðustu tilkynningu var ítrekað að hennar væri leitað og að málið væri í algerum forgangi. „Lögreglan á höfuðborgarsvæðinu lýsir enn eftir Birnu Brjánsdóttur, sem er fædd árið 1996, en síðast er vitað um ferðir hennar í miðborg Reykjavíkur um kl.5 aðfaranótt laugardags. Málið er í algjörum forgangi hjá lögreglu og unnið er úr öllum vísbendingum sem berast. Við rannsóknina, sem hefur staðið yfir sleitulaust í allan dag, hefur lögregla m.a. skoðað upptökur úr eftirlitsmyndavélum og símagögn, en það hefur ekki skilað árangri enn sem komið er. Allir þeir sem geta veitt upplýsingar um ferðir Birnu frá því kl. 5 í gærmorgun eru beðnir um að hafa samband við lögreglu í síma 444 - 1000.“
Athugasemdir