Þórhallur Örn Guðlaugsson, leiðbeinandi nemandans sem er talinn hafa spunnið upp ummæli í BA-ritgerð sinni, hefur birt rannsóknir sínar í svokölluðum gervifræðiritum. Skilgreina má gervifræðirit sem rit þar lítil sem engin ritrýni fer fram, höfundur greiðir fyrir birtingu og útgáfan er hugsuð út frá gróðasjónarmiðum. Nemandi Þórhalls er sagður hafa skáldað viðtal við Friðrik Pálsson, hótelstjóra á Hótel Rangá, í ritgerð sinni sem nefnist Markaðs- og markhópagreining á hótelmarkaðnum á Suðurlandi. „Hversu fýsilegt er að ráðast í framkvæmdir og rekstur á nýju Hóteli og baðaðstöðu á Suðurlandi“.

Greint var frá málinu í Fréttablaðinu á dögunum. Samkvæmt frétt Fréttablaðsins um málið bendir margt til þess að umrædd ritgerð sé að stórum hluta uppspuni. Friðrik Pálsson er sagður einn viðmælenda og er vitnað í hann í ritgerðinni. Friðrik segist aldrei hafa rætt við nemandann. Síðastliðinn laugardag greindi Vísir frá því að ritgerðin hafi fengið 8 í einkunn þrátt fyrir fjölmargar stafsetningavillur. Þrír meintir viðmælendur í ritgerðinni segja að nemandinn hafi ekki rætt við sig. Það verður því ekki betur séð en að Þórhallur hafi ekki kannað réttmæti heimilda nemanda síns.

Ekki náðist í Þórhall Örn við vinnslu fréttarinnar.

Tímaritin sögð „rándýr“ fræðimannasamfélagsins

Líkt og fyrr segir er leiðbeinandi nemandans, Þórhallur Örn Guðlaugsson, dósent við viðskiptafræðideild. DV fjallaði um notkun hans á svokölluðum gervifræðiritum í fyrra. Fyrir ári síðan mátti sjá á innri síðu hans á vef Háskóla Íslands þrjár greinar í undirflokknum „ritrýndar fræðigreinar“ sem hafi verið birtar í tímaritinu International Journal of Business and Social Science. Tímaritið International Journal of Business and Social Science er á vegum félags sem nefnist Centre for Promoting Ideas sem sagt er vera meðal verstu „rándýra“ fræðimannasamfélagsins.