Hreiðar Már Sigurðsson, fyrrverandi bankastjóri Kaupþings, hefur verið leystur úr haldi af Kvíabryggju, eftir að hafa afplánað 13 og hálfan mánuð af fimm og hálfs árs fangelsisdómi.

Hann mætti á áfangaheimilið Vernd rétt í þessu. Þar hefur hann fullt ferðafrelsi á daginn, en þarf að gista á áfangaheimilinu.

Auk Hreiðars Más var Elín Sigfúsdóttir, fyrrverandi framkvæmdastjóri fyrirtækjasviðs Landsbankans, leyst úr haldi í dag. Hún var dæmd í 18 mánaða fangelsi vegna Ímon-málsins og hóf afplánun um miðjan febrúar.

Laus vegna lagabreytingar

Ástæða þess að Hreiðar Már losnar eftir aðeins 13 mánuði er lagabreyting sem samþykkt var á Alþingi í mars. Samkvæmt henni lengist tími sem fangar eru undir rafrænu eftirliti og eiginleg fangelsisvist styttist. Í stað þess að fangar fengju tvo og hálfan dag á mánuði í rafrænu eftirliti fá þeir fimm daga í mánuði. 

Hreiðar Már kemur á Vernd Eftir að hafa afplánað rúmlega 13 mánuði af fimm og hálfs árs fangelsisdómi fyrir markaðsmisnotkun er Hreiðar Már Sigurðsson laus úr haldi. Hér sést hann koma á áfangaheimilið Vernd upp úr klukkan fimm í dag.

Mynd: Pressphotos

Hreiðar Már var dæmdur í febrúar í fyrra, ásamt Ólafi Ólafssyni, Sigurði Einarssyni og Magnúsi Guðmundssyni. Þeir þrír síðarnefndu voru leystir úr haldi 7. apríl og hafa notið frelsis á daginn síðan. Brot þeirra var viðskiptaflétta sem snerist um að veita sjeik Al Thani lán á laun fyrir kaupum á 5 prósenta hlut í Kaupþingi til að gefa til kynna betri stöðu bankans en raun var. Um sýndarviðskipti var að ræða. 

Hreiðar Már á enn óleyst mál í dómskerfinu. Bæði stóra markaðsmisnotkunarmál Kaupþings og svokallað Chesterfield-mál eru væntanleg fyrir Hæstarétt.

Verði hann dæmdur gæti hann farið aftur til afplánunar á Kvíabryggju.

Elín Sigfúsdóttir Fyrrverandi framkvæmdastjóri fyrirtækjasviðs Landsbankans kom á áfangaheimilið vernd skömmu fyrir kvöldmat.

Mynd: Pressphotos

Fangi af Vernd hótaði ofbeldi

Greint var frá því á dögunum að Sigurður Einarsson hefði hótað manni ofbeldi við 850 fermetra sumarbústað í Veiðilæk, sem var áður skráður eign Sigurðar. „Farðu svo ég þurfi ekki að berja þig,“ sagði Sigurður við vegfaranda sem tók myndband af atvikinu.

Sigurður sjálfur sló Íslandsmet með gjaldþroti sínu 23. september í fyrra. Aðeins 0,02% fékkst upp í 254,4 milljarða króna kröfur á hendur honum. Ekki er ljóst hvaða erindi hann átti við sumarbústaðinn. Bústaðurinn er skráður eign félagsins Rhea ehf, sem er í eigu JABB á Íslandi ehf,  sem er í eigu JABB í Lúxemborg. Félagið hér hefur enga starfsemi og er skráð á sama stað og Rhea. Framkvæmdastjóri félaganna er Þorkell Guðjónsson hjá Virtus fyrirtækjaráðgjöf. Hann neitaði  að gefa upp raunverulegan eiganda bústaðarins. 

Samkvæmt heimildum Stundarinnar verður atvikið skoðað hjá fangelsismálayfirvöldum.