„Ég man til­finn­ing­una vel, þegar ég ákvað að vera ham­ingju­söm,“ segir Hrund Þórs­dóttir, aðstoð­ar­rit­stjóri frétta­stofu Stöðvar 2. Systir hennar, Sunna, sem stóð henni afar nærri, hafði lát­ist í bílslysi aðeins 13 ára gömul. Andlát hennar tók sinn toll af allri fjöl­skyld­unni og um tíma var Hrund langt niðri. „Það fylgdu erf­iðir hlutir í kjöl­farið, enda hefur svona stórt áfall margs konar áhrif en við náðum að vinna úr þeim.“

Sama dag og Hrund ræðir við blaða­mann Stund­ar­innar eru þrettán ár liðin frá and­láti Sunnu. Yngri systir hennar er henni því ofar­lega í huga þennan dag­inn. Brott­hvarf hennar hafði mikil áhrif á Hrund, sem tók eftir áfallið með­vit­aða ákvörðun um að lifa líf­inu betur og nýta tím­ann vel. „Ég lof­aði henni að ég skyldi lifa líf­inu fyrir okkur báðar,“ segir hún. Hrund skrif­aði bók byggða á þess­ari hug­mynd, Loforðið, sem kom út árið 2007, en fyrir hana hlaut hún mikið lof og meðal ann­ars Íslensku barna­bóka­verð­launin. En það var ekki endi­lega hlaupið að því að upp­fylla lof­orðið. „Ég hafði alltaf haft það mjög gott en ég þurfti á því að halda að taka til í höfð­inu á mér og gera ákveðnar breyt­ingar í lífi mínu. Það tók tíma að verða ham­ingju­sam­ari, það gerð­ist ekki á einni nóttu. En ég var ákveðin í þessu, fór í mark­vissa sjálfs­vinnu og lærði smátt og smátt betur inn á sjálfa mig. Ég er glað­ari mann­eskja eftir það. Ég er sátt­ari með sjálfri mér.“