Löng röð var fram eftir Laugarveginum í morgun en fyrstu fimmtíu viðskiptavinum hins nýopnaða Dunkin' Donuts hafði verið lofað ársbirgðum af kleinuhringjum. Ársbirgðirnar nema þó aðeins sex kleinuhringjum á viku. Tugir manna voru í biðröð í morgun og höfðu sumir veðið í alla nótt. Mikið hefur verið rætt um böl þess fyrir Ísland að fá bakarí á borð við Dunkin' Donuts til landsins. Ýmis frægðarmenni hafa tjáð sig um málið. Til dæmis hefur Oddur Hrafn Stefán Björgvinsson, Krummi í Mínus, kvartað undan framgangi erlendra stórfyrirtækja á Íslandi. Bloggarinn Egill Helgason hefur sagt staði eins og Dunkin' Donuts vera eitur í borgarmenningu og bjóði upp á vondan og óhollan mat.

Löng röð Þeir sem höfðu lengst beðið komu fjórtán tímum fyrir opnun.

„Það er ekki bara að hinir alþjóðlegu skyndibitastaðir bjóði upp á vondan og óhollan mat, heldur eru þeir líka eins og sár í borgarmyndinni með sín freku vörumerki. Það er ekki gaman að ferðast og sjá alltaf sömu veitingahúsin hvert sem maður fer. Keðjurnar stóru, auðhringirnir, grafa auðvitað undan þeim sem fyrir eru, smákaupmönnunum og smáatvinnurekendunum uns einsleitnin verður óbærileg,“ skrifaði Egill síðastliðinn apríl og hvatti lesendur til að velja íslenskt. Fjölskylda Egils rekur íslenska sælkeraverslun í Reykjavík. 

Aðrir telja að staðurinn muni hvetja til ofþyngdar Íslendinga. 

Stundin ræddi við fyrsta viðskiptavin keðjunnar, Agöthu Rún Karlsdóttur, og fékk hennar álit á lýðheilsuáhrifum Dunkin' Donuts, en hún beið í fjórtán tíma fyrir utan hið nýopnaða bakarí. Hún segist ekki hafa neinar áhyggjur af því að þyngjast þó hún fái sex fría kleinuhringi á viku.

„Nei, ég held ég verði ekkert feitari eftir ár. Maður verður að fara í ræktina. Þetta fer bara eftir því hversu oft þú ert að borða kleinuhringi,“ segir Agatha.

Hún segist halda að sex kleinuhringir á viku sleppi og muni hún líka deila með vinum og vandamönnum.

Um áttatíu manns Viðstaddir töldu að um áttatíu manns voru í röðinni um níuleytið.

Klippti á borðann Agatha Rún Karlsdóttir klippti á borðann