Dögg er stödd norður í landi þegar Stundin nær sambandi við hana en fellst góðfúslega á að deila nokkrum uppskriftum að aflanum með lesendum. Fyrst er þó einboðið að setja hana í smá yfirheyrslu og komast að því hvað það er sem dregur hana að árbakkanum oft á sumri. Fyrsta spurningin er eðlilega hvenær hún hafi byrjað að stunda stangveiði?
„Ég byrjaði að veiða fyrir um fimm árum síðan og tók mín fyrstu köst í fluguveiðiskóla í Laxá í Dölum. Við vorum nokkur óvön saman undir styrkri leiðsögn Árna Friðleifssonar og voru frasarnir í fyrstu mjög framandi en flestir urðu forfallnir veiðimenn í kjölfarið. Eitthvað klikkaði kennslan því ég landaði ekki maríulaxinum fyrr en tveimur árum seinna.
Hvað ferðu í veiðitúra oft á sumri?
„Undanfarin ár hef ég farið tvisvar til þrisvar á sumri. Við erum með Efri-Haukadalsá á leigu og við reynum að fara þangað eins oft og við getum.“
Hvað er mest heillandi við veiðina?
„Félagsskapurinn, náttúran og að skipta alveg um umhverfi er mest heillandi en svo er líka ótrúlega gaman að landa fiski.“
Veiðirðu bæði á flugu og spún, lax og silung?
„Ég hef bara veitt á flugu og nánast bara rauðan frances. Efri-Haukadalsá er bleikjuá en við höfum aðallega fengið lax þar en ég hef líka veitt silung í Haukadalsá sem er laxveiðiá. Ég fagna bara öllu sem bítur á.“
Hvað skiptir mestu máli að hafa með sér í veiðiferðina?
„Góða vini, rauðan frances og nesti fyrir hamingjustundina.“
Taka eiginmaðurinn og börnin þátt í þessu sporti?
„Eiginmaðurinn er sjúkur veiðimaður þannig að hann kynnti mig fyrir þessu. Tæplega þriggja mánaða dóttir mín hefur farið bæði í Langá og Efri-Haukadalsá og sofið vært á bökkunum. Miðjudóttirin er mjög áhugasöm og hefur mikla þolinmæði. Hún er jafn áhugasöm um síli og laxa en við eigum eftir að fínpússa köstin hjá henni með flugustöngina. Sú elsta fékk maríulaxinn í Langá 8 ára.“
Hvað er mikilvægast að hafa í huga þegar nesti í veiðiferð er valið?
„Nestið er mjög mikilvægur hluti veiðinnar. Góðir ostar og kex, salami, salöt eru eðal. Það besta sem ég smakkaði í síðustu veiðiferð var súrdeigsbrauð með anda-rilette.“
Er áfengi nauðsynlegur hluti af veiðitúrnum, eins og margir halda fram?
„ Nei, alls ekki, en það sakar ekki að eiga eitthvað freyðandi til að skála fyrir góðum feng.“
Veiðirðu líka á veturna?
„Nei, ekki enn. Langar að prófa að veiða í vök og læt kannski verða af því næsta vetur. Sé samt frekar fyrir mér að vera með hús og gott kakó en að húka úti í kuldanum, svona eins og er alltaf í bíómyndunum.“
Hvaða ráð geturðu gefið fólki sem langar að taka þetta sport upp en veit ekki hvernig það á að byrja?
„Drífa sig af stað, það er hægt að leigja allar græjur og svo er fullt af flottum svæðum sem kosta lítið sem ekkert. Svo lærir fólk af reynslunni. Svo er sniðugt að lesa sér til um veiði og mæli ég þá sérstaklega með vefritinu Flugufréttum sem kemur út vikulega.“
Uppskriftir:
Hér fylgja uppskriftir sem gott er að nota í veiðihúsum eða á ferðalagi að lokinni veiði:
Teryaki-bleikja
Bleikja
Teryaki-sósa
Ristuð sesamfræ
Hellið teryaki-sósu yfir bleikjuflök í álpappír og stráið sesamfræjum yfir. Látið standa í 15–30 mínútur. Grillið á hæsta hita í ca 5 mínútur eða eftir þykkt flakanna.
Grillaður lax með smjörsósu
Laxaflök
Salt
Pipar
Sítróna
Kryddið laxaflökin með salti og pipar og þekið með þunnt skornum sneiðum af sítrónum. Vefjið inn í álpappír og grillið í 8 mínútur eða eftir þykkt flakanna. Látið jafna sig í nokkrar mínútur.
Hvítvínssmjörsósa
Smjör
Hvítvín
Skarlottlaukur (laukur)
Chili
Setjið smjörið í pott og skerið laukinn smátt og mýkið hann í smjörinu. Skerið chili smátt og bætið út í. Magn chili-fræja, sem sett er út í, fer eftir bragðlaukum hvers og eins og sumir sleppa þeim alveg. Hvítvíninu er svo blandað saman við í lokin.
Athugasemdir