Danskur blaðamaður ósáttur við íslenskan fjölmiðil: „Ég hata hálfvita, sem stela án þess að skammast sín“

Blaða­maður danska blaðs­ins Politi­ken, Jakob Sheikh, er ósáttur við það sem hann nefnir „rit­stuld“ íslensks fjöl­mið­ils, Eyjunnar.is. Hann fer hörðum orðum um mið­il­inn á Facebook.

Grein Jakobs um hvernig ungt fólk breyt­ist í öfga­menn og gengur til liðs við bar­áttu Íslamska rík­is­ins var birt nán­ast í orð­réttri þýð­ingu á Eyjunni í sept­em­ber í fyrra. Samkvæmt full­yrð­ingu Jakobs neit­uðu for­svars­menn Eyjunnar beiðni lög­manna hans um að taka grein­ina út. 

„Vanalega er ég glaður þegar útlenskir fjöl­miðlar byggja á sögu sem ég hef skrifað. Bara ekki þegar þeir stela vinn­unni minni – orð fyrir orð – án þess að borga fyrir notkun á höf­und­ar­rétt­vörðu efni. Frá síð­asta hausti hefur vinnu­veit­andi minn, Politi­ken, og nokkrir lög­fræð­ingar til dæmis staðið í bar­áttu við þennan íslenska skíta­miðil til að fá hann til að borga fyrir að nota þessa grein sem ég skrif­aði – eða í minnsta lagi að fá þá til að taka hana af síð­unni þeirra. 

„Mér finnst þetta mál skipta máli fyrir umræð­una um fjöl­miðla fram­tíð­ar­innar“

Venju­lega stend ég ekki í þess lags orr­ustum, en mér finnst þetta mál skipta máli fyrir umræð­una um fjöl­miðla fram­tíð­ar­innar. Því hér er það sem Íslend­ing­arnir segja um þjófn­að­inn á minni vinnu: „Við vitum vel að við stelum vinn­unni þinni án þess að borga fyrir það. En þú getur ekki komið á eftir okkur. Það er of mikið vesen. Og við vitum það vel. Þetta er hluti af við­skipta­mód­el­inu okkar.“

Við höfum nú sleppt mál­inu – það var ekki erf­ið­is­ins virði, er mér sagt. En ég hata hálf­vita, sem stela án þess að skamm­ast sín. Megi fjöl­miðla­fyr­ir­tækið ykkar hrynja til grunna eins hratt og mögu­legt er.“

Eyjan.is er gefin út af Vef­press­unni ehf. Samkvæmt upp­lýs­ingum frá Eyjunni er verið að fara yfir málið. Undir grein­inni hefur því hins vegar verið bætt við að hún byggi á grein Jakobs sem birt var í Politi­ken. 

Uppfært kl. 12.25. 

Í athuga­semd frá rit­stjóra Eyjunnar, Magnúsi Geir Eyj­ólfs­syni, segir að birt­ing grein­ar­innar hafi verið mis­tök blaða­manns, greinin hafi verið fjar­lægð af vefnum og Jakob beð­inn afsök­unnar. „Ég er sam­mála Jakobi að þarna hafi verið gengið of langt og þetta skrif­ast ein­fald­lega á mis­tök blaða­manns á sínum tíma, sem í stað þess að end­ur­segja frétt­ina líkt og íslenskir fjöl­miðlar hafa gert árum saman ein­fald­lega tekur hana orð­rétt upp. Þetta er ein­stakt til­felli og alls ekki í sam­ræmi við okkar starfsvenjur. Við tökum gagn­rýni Jakobs mjög alvar­lega og höfum bæði fjar­lægt grein­ina af vefnum og beðið hann per­sónu­lega afsök­unar.“